नगर ः नगर जिल्ह्याच्या उत्तर भागात बिबट्याचे वास्तव्य आहे. तो लोकांच्या वस्तीजवळच रहिवास करतो. शेतकऱ्यांवर हल्ला केल्याच्या बातम्या कायम येत असतात. मात्र, शहरी लोक त्याकडे दुर्लक्ष करतात. परंतु बिबट्या थेट नगर शहराच्या वेशीवर येऊन धडकला आहे. सहा महिन्यांपूर्वी तो एमआयडीसी परिसरात आला होता. नेमके एका कंपनीतील सीसीटीव्ही फुटेजमध्ये तो कैद झाल्याने वन विभागानेही त्याची नोंद केली.  

अहमदनगर शहरातील अभिजित पाडळकर, पराग गावडे, प्रवीण राठोड यांच्यासह काही जण आज (रविवारी) सुटी असल्याने चांदबीबी महाल परिसरात फिरायला गेले होते. महालाजवळ त्यांना मोराचा मनमोहक आवाज ऐकू आला. त्यांचे पाय आपसूक आवाजाच्या दिशेने वळले.

हेही वाचा ः लॉकडाउन ः ऑनलाईन स्पर्धेत भाग घेताय...सावधान, तुमच्यासोबत होऊ शकतो हा धोका

 रस्त्यापासून अवघ्या 200 फुटांवर त्यांना मोर दिसला. मोराजवळ पोचताच, करवंदाच्या जाळीत मोराच्या शिकारीसाठी दबा धरून बसलेला बिबट्या त्यांना दिसला. जास्त माणसांना पाहून, डरकाळी फोडून बिबट्याने धूम ठोकली. 

अवश्य वाचा ः अजून पहिलीचेच ऍडमिशन अडलंय 

व्याघ्र संरक्षण समिती सदस्य मंदार साबळे यांना याबाबत माहिती देण्यात आली. त्यांनी तातडीने घटनास्थळी धाव घेत, ही माहिती जिल्हा उपवनसंरक्षक आदर्श रेड्डी व वनपरिक्षेत्र अधिकारी एन. बी. पोकळे, वनपरिक्षेत्र अधिकारी, फिरत्या पथकाचे सुनील थिटे यांना दिली. वन विभागाचे पथकही तातडीने घटनास्थळी आले. साबळे यांनी घटनास्थळाची पाहणी केली. तेथे बिबट्याच्या पायांचे ठसे दिसून आले.