पाथर्डी (जि. अहमदनगर) : प्रामाणिकपणे जनतेची कामे करत राहिलो, तर जनता तुमच्या पाठीशी उभी राहते, हे आपण दोन विधानसभा निवडणुकांत अनुभवले आहे. त्यामुळे आपण विरोधकांच्या टीकेची पर्वा करत नसून, जनतेची कामे करत राहू, असा टोला आमदार मोनिका राजळे यांनी राष्ट्रवादीचे प्रदेश सरचिटणीस ॲड. प्रताप ढाकणे यांचा नामोल्लेख टाळून लगावला.

पंचायत समिती सदस्या मनीषा वायकर यांच्या निधीतून माळीबाभूळगाव येथे विविध विकासकामांचा प्रारंभ करण्यात आला. त्यावेळी त्या बोलत होत्या. भाजपचे तालुकाध्यक्ष माणिक खेडकर, सोमनाथ खेडकर, जिल्हा परिषद सदस्या संध्या आठरे, राहुल राजळे, पंचायत समिती सभापती सुनीता दौंड, एकनाथ आटकर, नामदेव लबडे, रवींद्र वायकर, मढी देवस्थानचे अध्यक्ष संजय मरकड उपस्थित होते.

राजळे म्हणाल्या, अतिवृष्टीमुळे नुकसान झालेल्यांना भरपाई मिळावी म्हणून आम्ही अहमदनगर येथे उपोषण केले, तर काहींनी आमच्यावर टीका केली. ही टीका आमच्यावर नसून नुकसानग्रस्तांचा अपमान आहे. राजकारण कोठे करावे, याचे भान काहींना राहिले नाही. तालुका विकासाच्या प्रवाहात आहे. नुकत्याच जाहीर झालेल्या केंद्रीय लोकसेवा आयोगाच्या परीक्षेत तालुक्यातील तीन विद्यार्थ्यांनी यश संपादन केले असल्याचे त्या शेवटी म्हणाल्या. प्रास्ताविक आर. बी. शेख सूत्रसंचालन राजू सुरवसे, तर आभार रशीद शेख यांनी मानले.