श्रीरामपूर ः कोरोनामुळे देशात दोन महिन्यांपासून लॉकडाउन सुरू आहे. तालुक्‍यातील दत्तनगर येथील शेतकरी संजय ऊर्फ काकासाहेब रामभाऊ शिंदे (वय 43) यांचे चेन्नई येथे निधन झाले. मात्र, त्यांचे पार्थिव इकडे आणणे किंवा नातेवाईकांना येथून तिकडे जाणे अशक्‍य होते. आई तर मुलाची आतुरतेने वाट पाहत होती.

दत्तनगर येथील संजय शिंदे यांचे काल (ता. 10) चेन्नई येथील एमजीएम रुग्णालयात उपचारादरम्यान निधन झाले. शिंदे यांच्यावर स्थानिक डॉक्‍टरांच्या सल्ल्यानुसार, तीन महिन्यांपासून पुण्यातील खासगी रुग्णालयात उपचार सुरू होते. मात्र, औषधोपचारास प्रतिसाद देत नसल्याने त्यांना चेन्नई येथील रुग्णालयात हलविण्यात आले. मात्र, तेथेही प्रकृती बिघडल्याने शिंदे यांचे निधन झाले.

हेही वाचा - फेसबुक, व्हॉटसअॅपवरील दुसऱ्याची पोस्ट चोरत असाल तर सावधान

त्यांचे सर्व नातेवाईक दत्तनगर येथे असून, लॉकडाउनमुळे मृतदेह इकडे आणणे शक्‍य नव्हते. त्यांच्या पत्नी, बंधू उद्योजक नंदू शिंदे व बापू शिंदे यांनी चेन्नई येथेच त्यांच्यावर अंत्यसंस्कार केले. संजय यांच्या आई, बंधू, दत्तनगरचे माजी उपसरपंच नानासाहेब शिंदे व पंचायत समितीच्या सभापती संगीता शिंदे यांच्यासह अनेकांनी व्हिडिओ कॉलवरच त्यांना अखेरचा निरोप दिला.