नगर ः नगर जिल्ह्यात कोरोनाने फास आवळला आहे. दररोज नवीन रूग्ण सापडत आहेत. परंतु सरकारी कार्यालांनाही बाधा होत आहे. पोलिस कर्मचारी, महापालिका आणि जिल्हा परिषदही बाधली आहे.

जिल्हा परिषदेत एका प्रमुख पदाधिकाऱ्याच्या दालनाशेजारील कर्मचाऱ्याचा अहवाल पॉझिटिव्ह आला आहे. त्यामुळे सर्वच पदाधिकारी व त्याचे सहकारी कर्मचारी धास्तावले आहेत. त्या कर्मचाऱ्याच्या निकट संपर्कात दोन कर्मचारी आहेत. परंतु पदाधिकारीही आले आहेत.त्यामुळे सर्वाच्याच मनात भीती दाटली आहे. आपलाही स्वॅब द्यावा की क्वारंटाइन व्हावे, असा संभ्रम त्यांच्या मनात आहे. संबंधित कर्मचारी बाधित निघाल्याने संपर्कातील अनेकांनी तर मोबाईलच बंद करून ठेवले.

प्रमुख पदाधिकाऱ्याच्या दालनाशेजारीच हा कर्मचारी बसतो. त्यामुळे संबंधित पदाधिकाऱ्याकडे येणाऱ्या लोकांच्याही तो संपर्कात आल्याचे सांगितले जाते. त्यामुळे नेमक्या किती लोकांना त्याने बाधित केले होते तपासणीनंतरच समजेल.

हेही वाचा- नेवाशात येत असाल तर थांबा

त्याच्या निकट संपर्कातील दोन लोकांना तपासणीसाठी पाठवले आहे. त्यांच्या स्वॅबकडे सर्वांचे लक्ष लागले आहे. संबंधित कर्मचारी बाधित आढळल्यानंतर जिल्हा परिषदेतील गर्दी हटली. सर्वच दालनात शुकशुकाट झाला. पदाधिकारीही जिल्हा परिषद आवारात फिरकेना झाले आहेत. संबंधित कर्मचारी जेथेबसतो त्या शेजारील दोन विभाग सील करण्यात आले आहे.

हा कर्मचारी रजेवर होता. चार दिवसांपूर्वीच तो पुन्हा रूजू झाला होता. नंतर त्रास जाणवू लागल्याने त्याचा स्वॅब घेण्यात आला.

संपादन - अशोक निंबाळकर