राहुरी : निळवंडे धरण प्रकल्पाच्या कालव्यांची कामे अपूर्ण आहेत. तशी माहिती स्थानिक नेत्यांनी पंतप्रधानांना दिलेली दिसत नाही. लोकसभा निवडणूक डोळ्यांसमोर ठेवून पंतप्रधानांच्या हस्ते अर्धवट कामे झालेल्या निळवंडे प्रकल्पाचे लोकार्पण करुन लाभार्थी शेतकऱ्यांच्या जखमेवर मीठ चोळले आहे, अशी टीका माजी मंत्री आमदार प्राजक्त तनपुरे यांनी पत्रकार परिषदेत केली.

राहुरी येथे आज सायंकाळी पत्रकारांशी बोलताना आमदार तनपुरे म्हणाले की, निळवंडे धरणाच्या उजव्या कालव्याची राहुरी तालुक्यातील काही कामांना प्रत्यक्षात सुरुवातही झालेली नाही. डाव्या कालव्याची चाचणी घेण्यासाठी पाणी सोडताना दोन महिन्यांत उजव्या कालव्याला पाणी सोडले जाईल, असे आश्वासन दिले होते. परंतु, वन खात्याच्या हद्दीतील कामांना परवानगी नसल्याने उजव्या कालव्याची कामे रखडली आहेत.

यापूर्वीच्या भाजप सरकारने पाच वर्षांत जेवढा निधी दिला, तेवढा महाविकास आघाडीने कोरोना संकट काळात प्रत्येक वर्षी निधी देऊन निळवंडेच्या कामांना गती दिली. तत्कालीन जलसंपदामंत्री जयंत पाटील व महसूलमंत्री बाळासाहेब थोरात यांच्या पाठपुराव्यातून भरीव निधी मिळाला. दुर्दैवाने गतिमंद सरकार आल्यावर गौण खनिजाच्या समस्येमुळे आठ महिने निळवंडेचे काम रखडले.

शेतकरी व मराठा समाजाच्या नाराजीचा फटका बसण्याची शक्यता गृहीत धरून पंतप्रधानांच्या सभेला माणसं गोळा करण्याची केवीलवाणी वेळ आली. त्यासाठी जिल्ह्यातील सर्व शासकीय यंत्रणा कामाला लावावी लागली. अधिकाऱ्यांना टार्गेट दिले. शासनाच्या विविध योजनांचा लाभ घेतलेल्या लाभार्थ्यांना कार्यक्रमाशी काडीमात्र संबंध नसतांना बळजबरीने जाण्यास भाग पाडले. तरी, कार्यक्रमाला जाणाऱ्या अनेक बस रिकाम्या धावल्या.

- प्राजक्त तनपुरे, माजी मंत्री