पारनेर ः जामगाव येथील 62 वर्षीय वृद्धाचा मृत्यू हृदयविकाराने झाल्याचा अहवाल जिल्हा रूग्णालयाने दिला आहे. तसेच त्यांच्या पत्नी यांचाही स्त्राव घेण्यात आला होता, तो अहवालसुद्धा निगेटीव्ह आला आहे. त्यामुळे जामगाव आद्यापि कोरोनामुक्तच असल्याचे सिद्ध झाले आहे. 

हेही वाचा - मंत्री तनपुरे यांनी राणेंना पुन्हा खिजवलं

या बाबत माहिती अशी की, जामगाव येथील एका वृद्धास छातीत त्रास होऊ लागल्याने जिल्हा रूग्णालयात दाखल केले होते. मात्र, तेथे त्यांचा (ता. 26 ) मृत्यू झाला होता. त्या नंतर त्यांच्या मृतदेहाचे शवविच्छेदन करण्यात आले. त्या वेळी त्यांचा मृत्यू हृदयविकाराने झाल्याचा निष्पन्न झाले आहे. तसा अहवाल जिल्हा रूगण्लयाने दिला आहे. तसेच त्यांच्या पत्नी यांनाही त्या वेळी तपासणीसाठी जिल्हा रूगण्लयात नेले होते. त्यांचाही स्त्राव घेण्यात आला होता. त्यांच्या पत्नीचा अहवालसुद्धा निगेटीव्ह आला आहे.

या बाबत गावात उलटसुलट चर्चा सुरू आहे. या दोघांनाही कोरोनाची लागण झाली नसल्याचे त्यांचा जिल्हा रूग्णालयाने दिलेल्या अहवालावरून स्पष्ट झाले आहे. त्या वृद्धाच्या पत्नीची प्रकृती सध्या ठणठणीत असल्याची माहिती डॉक्टर व त्यांचे निकटवर्तीय नातेवाईक सतीश शिंदे यांनी दिली. कोरोनाच्या पार्श्वभूमीवर सध्या सोशल मीडियात वावड्या उडवल्या जातात. त्याचा मानसिक त्रास संबंधित रूग्ण तसेच नातेवाईंकांना होतो.