अहमदनगर : वाहनाने धडक दिल्याने रस्त्याने फिरण्यास गेलेली महिला ठार झाली. बुऱ्हाणनगर- वारुळवाडी (ता.नगर) रस्त्यावर मंगळवारी (ता. 25) सकाळी पावणे आठ वाजण्याच्या सुमारास हा अपघात झाला. या प्रकरणी भिंगार कॅम्प पोलिस ठाण्यात अपघाताचा गुन्हा दाखल करण्यात आला आहे.

गयाबाई वसंत वाघ (वय 54, रा. गुगळे कॉलनी, बुऱ्हाणनगर) या वारुळवाडी रस्त्यावर सोपान कर्डिले यांच्या घरासमोर सकाळी फिरण्यासाठी गेल्या होत्या. त्यांना वाहनाने जोराची धडक दिली. वाहन चालक या अपघातानंतर वाहनासह पळून गेला. त्यांची मुलगी रोहिणी वसंत वाघ यांनी दिलेल्या फिर्यादीवरून भिंगार कॅम्प पोलिस ठाण्यात वाहन चालकाविरुद्ध सदोष मनुष्यवधाचा गुन्हा दाखल करण्यात आला आहे. पोलिस नाईक साठे पुढील तपास करीत आहेत.