नगर : सार्वजनिक ठिकाणी थुंकणाऱ्यांवर दंडात्मक कारवाईच्या प्रस्तावाला जिल्हा परिषदेच्या सभेत मंजुरी मिळाल्यानंतर, प्रस्ताव मंजुरीसाठी विभागीय आयुक्तांकडे पाठविण्यात आला. त्याला त्यांनी हिरवा कंदील दाखविल्याने, आता प्रत्यक्ष कारवाईला सुरवात होत आहे. या ठरावाची आता राजपत्रात नोंद होणार असून, जिल्ह्यात कारवाईला लवकरच सुरवात होणार आहे. 

हेही वाचा ः कोरोना नियमांची पायमल्ली कराल तर...

सार्वजनिक आरोग्य चांगले राहावे, यासाठी जिल्हा परिषदेने सार्वजनिक ठिकाणी थुंकणाऱ्यांवर कारवाईचा प्रस्ताव जिल्हा परिषदेचे मुख्य कार्यकारी अधिकारी शिवराज पाटील यांच्या पुढाकारातून केला. महाराष्ट्र ग्रामपंचायत कायद्यामध्ये उपविधीद्वारे दुरुस्ती करून तो जिल्हा परिषदेच्या सर्वसाधारण सभेत मांडण्यात आला.

अवश्य वाचा ः यामुळेच झाला नगर जिल्हा परिषदेचा राज्यात बोलबाला!

जिल्हा परिषदेच्या लेखी प्रतिपादन सभेत हा ठराव मंजूर झाला. त्यानंतर कार्योत्तर मंजुरीसाठी तो विभागीय आयुक्तांकडे पाठविण्यात आला. त्याला विभागीय आयुक्तांनी मंजुरी दिली. त्यामुळे आता ग्रामीण भागात सार्वजनिक ठिकाणी थुंकणाऱ्यांवर 50 रुपये दंडात्मक कारवाई होईल. ही सर्व प्रक्रिया लवकरच सुरू होणार आहे. 

मास्क नसल्यावरही होणार दंड 
या अधिनियम दुरुस्तीत सार्वजनिक ठिकाणी थुंकणाऱ्यांबरोबरच सार्वजनिक ठिकाणी मास्क न वापरणाऱ्यांवरही कार्यवाहीची तरतूद करण्यात आली आहे. त्यामुळे कोरोना विषाणूचा फैलाव रोखण्यासाठी ही दंडात्मक कारवाई महत्त्वाची ठरणार आहे. 

सार्वजनिक ठिकाणी थुंकणाऱ्यांना 50 रुपये दंडाच्या प्रस्तावाला सर्वसाधारण सभेनंतर आता विभागीय आयुक्तांनी मंजुरी दिली असून, त्याची राजपत्रात नोंद होणार आहे. या दंडात्मक कारवाईला लवकरच जिल्ह्यात सुरवात होणार आहे. 
- निखिलकुमार ओसवाल, उपमुख्य कार्यकारी अधिकारी, ग्रामपंचायत विभाग