कोल्हार,  : डोक्‍यावर आग ओकणारा सूर्य, मैलोन मैल पायपीट केल्यामुळे पोटात भुकेचा उडालेला 
भडका, डोक्‍यावर सामानाचे ओझे आणि खांद्यावर लेकरे, अशा स्थितीत मजल-दरमजल करीत शेकडो किलोमीटरचा प्रवास करीत आपल्या गावी निघालेल्या मजुरांना पिण्याचे पाणी मिळाले आणि घशाला कोरड पडलेल्या लहानग्याने पाण्याचा पाइपच तोंडाला लावला. 

हेही वाचा - कोरोना हटत नाही तोच जगापुढे नवे टेन्शन

ओतूर (जि. पुणे) येथून मध्य प्रदेशात निघालेल्या शेतमजुरांवर लॉकडाउनमुळे बेतलेला हा विदारक प्रसंग. देशव्यापी लॉकडाउनमुळे विविध राज्यांमध्ये अडकून पडलेले हजारो कामगार, विद्यार्थी, पर्यटक आणि भाविकांच्या परतीचा मार्ग अखेर खुला झाला. या सर्वांची विशेष बसगाड्यांद्वारे त्यांच्या राज्यात रवानगी करण्यास केंद्राने राज्य सरकारांना परवानगी दिली.

गृह मंत्रालयाच्या या निर्णयामुळे देशभरातील 
लाखो स्थलांतरितांना मोठा दिलासा मिळाला. परंतु आजही त्याबाबत सरकारच्या या निर्णयाबाबत प्रशासकीय व्यवस्था व पोलिस यंत्रणा अनभिज्ञ असल्याचे दिसते. ओतूरला शेतीच्या कामासाठी मध्य प्रदेशातील मजूर दरवर्षीप्रमाणे यंदाही आले होते.

ही शेतकऱ्यांकडे कांदा काढण्यासाठी त्यांना स्थानिकांनी परवानगी दिली. परंतु प्रशासनाने ती नाकारली, म्हणून महिला व लहान मुलांसह मजूर मध्य प्रदेशात जाण्यासाठी पायी निघाले होते. रस्त्यात एका ट्रकचालकाने त्यांना गाडीत घेतले. तो ट्रक संगमनेरहून नगरला जात होता. चालकाने त्यांना कोल्हारला लोणी रस्त्याच्या चौकात सोडले. त्यांच्याकडून जास्त भाडेही घेतले. मजुरांना मध्य प्रदेशात जायचे असल्यामुळे त्यांनी शिर्डीकडे जाण्याचा रस्ता धरला.

वास्तविक पाहता त्यांना संगमनेरहून झगडे फाटामार्गे शिर्डी व त्यापुढील रस्ता जवळचा पडला असता. वाटेत ते तहानेने व्याकूळ झाले होते. त्यांना तिसगाववाडी फाट्यावरील मनोज गिरमे या शेतकऱ्याने पिण्यासाठी पाण्याची व्यवस्था केली व जेवणाबाबतही विचारपूस केली. मजुरांनी बाभळेश्वरजवळ रस्त्याच्या कडेला एका झाडाखाली स्वयंपाकासाठी दगडाची चूल मांडून जेवण करून पुढील प्रवासाला ते रवाना झाले.