पंतप्रधान नरेंद्र मोदी आज (26 ऑक्टोबर) अहमदनगर जिल्ह्याच्या दौऱ्यावर येणार आहेत.अहमदनगर जिल्ह्यातील शिर्डी आणि अकोले या दोन ठिकाणी त्यांच्या हस्ते विविध कार्यक्रमांचा लोकार्पण सोहळा यावेळी पार पडणार आहे. पंतप्रधान मोदी यांच्या दौऱ्याची सुरू असलेली जोरदार तयारी आता अंतिम टप्प्यात आली आहे. शिर्डी शहरात मोठा पोलीस बंदोबस्त तैनात करण्यात आला आहे. यानंतर शिर्डीजवळील काकडी गावात पंतप्रधान मोदींची जनसभा होणार आहे.

नरेंद्र मोदी दौऱ्याची सुरुवात साईबाबांच्या समाधीच दर्शन घेऊन करणार आहेत. गुजरातचे मुख्यमंत्री असताना 2008 साली आणि देशाचे पंतप्रधान झाल्यावर 2018 साली नरेंद्र मोदी शिर्डीत साईबाबांच्या दर्शनाला आले होते. त्यानंतर आज तिसऱ्यांदा ते साईबाबांच्या चरणी नतमस्तक होणार आहेत. तब्बल ५ वर्षांनी पंतप्रधान नरेंद्र मोदी साई बाबाचे दर्शन घेणार आहेत. आज पाच वर्षांनी वातानुकूलित दर्शन रांगेचं लोकार्पण करण्यासाठी नरेंद्र मोदी शिर्डीत येत आहेत.

दरम्यान आज देखील पंतप्रधान मोदी यांच्या हस्ते विविध विकासकामांच शुभारंभ होणार असून अहमदनगरच्या आयुष रुग्णालयाचं देखील पंतप्रधान नरेंद्र मोदी यांच्या हस्ते ई-प्रणालीद्वारे लोकार्पण करतील.

कसा असेल पंतप्रधान मोदींचा अहमदनगर दौरा?

पंतप्रधान मोदी दुपारी 1 वाजता शिर्डीत दाखल होणार

त्यानंतर पंतप्रधान मोदी साईबाबा समाधी मंदिराचं दर्शन घेत, पूजा करतील

पंतप्रधान दुपारी 2 वाजता निळवंडे धरणाचं जलपूजन करणार

यावेळी निळवंडे धरणाच्या कॅनलचं लोकार्पण पंतप्रधानांच्या हस्ते केलं जाईल

पंतप्रधान दुपारी 3.15 वाजता विविध प्रकल्पांची पायाभरणी करतील

सुमारे 7 हजार 500 कोटींच्या या प्रकल्पात आरोग्य, रेल्वे, रस्ते, तेल, गॅस क्षेत्रातील प्रकल्पांचा समावेश

या प्रकल्पांचे भूमीपूजन केल्यानंतर पंतप्रधान सायंकाळी 6.30 वाजता गोव्याला रवाना होतील