राशीन : येथील पुंडे कुटुंबीयांच्या पुढाकारातून राशीनमध्ये पासष्ट वर्षांपासून दरवर्षी राम जन्मोत्सव सोहळा साजरा केला जात आहे. पुंडे कुटुंबीयांची रामभक्ती आणि त्यांच्याकडून केला जात असलेल्या राम जन्मोत्सवाने जवळजवळ साडेपाच तपांचा कालावधी पूर्ण केला आहे.

या कालखंडात पुंडे कुटुंबीयांच्या माध्यमातून हजारो भाविक रामभक्तीच्या सेवेत दाखल झाले आहेत. ही परंपरा विनामोबदला आजही अखंड सुरू असून त्याद्वारे घराघरात भगवान श्रीराम आणि त्यांचे महात्म्य पोहोचले आहे.

६५ वर्षांपूर्वी (१९५९) हभप श्रीधर पुंडे गुरुजी यांनी सुरू केलेला रामजन्मोत्सव आणि अखंड राम-नाम-जप आजही तितक्याच भक्तिभावाने आणि त्याहीपेक्षा अधिक जोमाने राशीनमध्ये सुरू आहे.

पुंडे गुरुजी नंतर भगवान श्रीरामाच्या जन्मोत्सवाचा आणि सेवेचा वारसा त्यांचे चिरंजीव ॲड. अरुण पुंडे यांनी भक्तिभावाच्या मार्गावरून आणि सांप्रदायाच्या भक्कम विचारधारेतून पुढे चालवला आहे. हजारो भाविकांच्या मुखात, मनात आणि ध्यानात राम नाम देण्याचे अतुलनीय काम ॲड. पुंडे यांनी केले आहे.

अयोध्येच्या पार्श्वभूमीवर...

अयोध्येत श्रीराम मूर्ती प्राणप्रतिष्ठेनिमित्त सामुदायिक रामरक्षा स्रोत पठण व श्रीराम नाम अखंड जपाचे आयोजन करण्यात आले आहे. ग्रामप्रदक्षिणा, रामफेरी, काकडा, भजन श्रीरामास अभिषेक, हनुमान चालिसा पठण,

महाआरती, सवाद्य भव्य मिरवणूक आणि महाप्रसाद असे शनिवार ते सोमवार तीन दिवस कार्यक्रमांचे आयोजन करण्यात आले आहे. अयोध्येतील मूर्ती प्राणप्रतिष्ठेचे लाइव्ह प्रक्षेपण पडद्यावर दाखविण्याचे नियोजन करण्यात आल्याची माहिती ॲड. अरुण पुंडे यांनी दिली.

पाचशे एक घरांत राम जप

या राम मंदिरात दरवर्षी चैत्रशुद्ध प्रतिपदा ते रामनवमी दरम्यान दहा दिवस रामजन्मोत्सवानिमित्त विविध धार्मिक कार्यक्रम आयोजित करून रामजन्मोत्सव साजरा केला जातो. पुंडे यांनी काही वर्षांपूर्वी राशीनमधील पाचशे एक घरांमध्ये पाचशे एक दिवस रामनाम जप केला. दरदिवशी एका नवीन घरात राम नाम जप करण्याचे काम त्यांनी केले.

लोकसहभागातून साकारले राम मंदिर

राशीनमध्ये रामाचे मोठे मंदिर नव्हते. २७ वर्षांपूर्वी म्हणजे १९९७ साली १६ व्या शतकातील उदबोधन मठात ॲड. पुंडे यांनी लोकसहभागातून सुंदर असे राम मंदिर साकारले. साडेतीन फूट उंचीच्या राम-लक्ष्मण आणि सीतेच्या संगमरवरी मूर्ती बसविल्या.