सोनई : मोरयाचिंचोरे येथील तळ्याने तळ गाठल्याची बातमी ‘सकाळ’मध्ये प्रसिद्ध होताच वांबोरी चारी यंत्रणेच्या माध्यमातून बंद नलिकेतून मोरयाचिंचोरे तलावात पाणी सोडण्यास सुरुवात झाली आहे. जनावरांचा व माणसांचा पिण्याच्या पाण्याचा प्रश्न, तसेच येथील जंगलातील हरीण, काळवीट व इतर लहान पशुपक्षांची आता तहान भागली जाणार आहे.

यावर्षी अतिशय कमी प्रमाणात पाऊस झाल्याने मोरयाचिंचोरे, लोहगाव, धनगरवाडी भागात नोव्हेंबर महिन्यातच शेती व पिण्याच्या पाण्याची चणचण जाणवू लागली. येथील तळ्याने तळ गाठल्याने उन्हाळ्याची चिंता लागली होती. पिण्याच्या पाण्याचा प्रश्न म्हणून येथील सद्यस्थिती ‘सकाळ’मधून मांडण्यात आल्यानंतर संबंधित विभागाने वांबोरी चारीच्या बंद नलिकेतून तलावात पाणी सोडण्यास सुरुवात केली आहे.

हा संपूर्ण परिसर अनेक वर्षांपासून जिरायत पट्टा म्हणून प्रसिद्ध आहे. येथील परिसरात आमदार शंकरराव गडाख व माजी सभापती सुनील गडाख यांच्या प्रयत्नांतून जलसंधारणाचे काम करण्यात आल्याने अलिकडच्या सहा ते सात वर्षांत परिसर हिरवागार दिसू लागला आहे. सध्या कपाशी मोडल्यानंतर पुढे काय हा प्रश्न आहे. ऊस व कांद्याच्या लागवडी थांबल्या आहेत. जनावरे व पिण्याच्या पाण्याकरिता तलावात पाणी सोडावे, अशी मागणी होत होती.

तलावात पाणी सोडले. मात्र, त्यावर संबंधितांचे लक्ष नसल्याने आवक खूपच कमी आहे. असेच चित्र राहिले, तर उपयोग होणार नाही.

- विष्णू इलग, ग्रामस्थ, मोरयाचिंचोरे

मुळा धरणातून असलेल्या बंद नलिका वांबोरी चारीमधून धनगरवाडी, मोरयाचिंचोरे व कात्रड येथील तलावासाठी पाणी देण्यास सुरुवात करण्यात आली. वरून कमी, अधिक पाणी येत असल्याने अडचण येत आहे.

- बाळासाहेब थोरात, मोजणीदार, वांबोरी चारी