सोनई (जि. नगर) : अध्यात्माच्या गोडीप्रमाणेच अन्नदानात असलेल्या गोडीची आठवण आली आणि ज्येष्ठ नेते यशवंतराव गडाखांनी सवंगड्यांसह सद्‍गुरू नारायणगिरी वारकरी शिक्षण संस्थेला सदिच्छा भेट दिली. तेथे आमटी-भाकरीचा मनसोक्त आस्वाद घेतला. अध्यात्म व साहित्याची ही अपूर्व भेट भक्तांना चांगलीच भावली.

सद्‍गुरू नारायणगिरी महाराज प्रबोधन प्रतिष्ठानचे प्रमुख महंत उद्धव महाराज मंडलिक सोनई येथील जगदंबादेवी मंदिरात एका कार्यक्रमानिमित्त आले होते. त्यावेळी गडाख यांनी आपल्या भाषणात, आश्रमातील आमटी-भाकरी व बेसनवडीची चव आजही जिभेवर रेंगाळत आहे, असे सांगितले. त्याचा धागा पकडत मंडलिक महाराजांनी आपल्या भाषणात गडाखांना आश्रमभेटीचे निमंत्रण दिले होते.
गडाखांनी आज नेवासे बुद्रुक येथील आश्रमास भेट दिली. तेथे वारकरी संप्रदायाचे शिक्षण घेत असलेल्या विद्यार्थ्यांशी संवाद साधला. यावेळी मुळा कारखान्याचे अध्यक्ष नानासाहेब तुवर, उपाध्यक्ष कडुबाळ कर्डिले, तुकाराम नवले, कारभारी वाखुरे, ॲड. काका गायके, अण्णासाहेब पटारे, बाळासाहेब कोकणे आदी उपस्थित होते. त्यानंतर आमटी-भाकरी, मिरचीचा ठेचा, बेसनवडीचा आस्वाद गडाख व त्यांच्या सहकाऱ्यांनी घेतला.

''महंत उद्धव महाराज आध्यात्मिक शिक्षणाला शालेय शिक्षणाची जोड देत पिढी घडवत आहेत. येथील प्रेम, आपुलकी व स्नेहभाव पाहून मनाला समाधान लाभले.'' - यशवंतराव गडाख, ज्येष्ठ साहित्यिक

''मनोबल व आत्मबल उत्तम असेल, तर संकटावर मात करणे शक्य होते, हे यशवंतराव गडाख यांनी दाखवून दिले आहे. त्यांनी कठीण प्रसंगात उभ्या केलेल्या संस्था आज राज्यात नावारूपाला आल्या. हे ऋषितुल्य कार्य तालुक्यास भूषणावह आहे.'' - महंत उद्धव महाराज मंडलिक, नेवासे