राहुरी (जि.अहमदनगर) : दोन साडू सासऱ्याच्या घरी पाहुणचाराला आले. पण सासुरवाडीत त्यांनी अशी काही करामत केली की सासऱ्याला स्वत:चं डोकं झोडून घेण्याची वेळ आली. साडूंच्या या करामतीने सासऱ्यावर बलामत आली. काय घडले नेमके? (son-in-laws-theft-crime-marathi-news-jpd93)

घटनेची माहिती अशी -

दोन साडू सासऱ्याच्या घरी पाहुणचाराला आले. मध्यरात्री त्यांनी सासुरवाडीतील दोन दुचाकी चोरल्या. एका दुचाकीच्या चोरीचा गुन्हा दाखल झाला. सासऱ्याच्या घरातून पोलिसांनी आरोपी साडूभाऊंना ताब्यात घेत दोन्ही दुचाकी हस्तगत केल्या. साडूंच्या या करामतीने सासऱ्यावर बलामत आली. वांबोरी येथे बुधवारी (ता. २१) मध्यरात्रीच्या सुमारास घरासमोर लावलेल्या दोन दुचाकींची चोरी झाली. प्रसाद प्रदीप धावडे (रा. वांबोरी) यांच्या फिर्यादीवरून गुरुवारी (ता. २२) दुचाकीचोरीचाबाबत गुन्हा दाखल करण्यात आला. पोलिस निरीक्षक नंदकुमार दुधाळ यांना संशयित कात्रड येथे असल्याची माहिती मिळाली. गुन्हा दाखल झाल्यावर अवघ्या दोन तासांत पोलिसांनी दोन्ही आरोपींना सासऱ्याच्या घरातून ताब्यात घेतले. त्यानंतर आरोपींनी वांबोरी-राहुरी रस्त्यावर, वांबोरीपासून तीन किलोमीटर अंतरावर एका खडी क्रशरजवळ झाडाखाली लपवून ठेवलेल्या दुचाकी पोलिसांना दिल्या. ही कारवाई पोलिस उपनिरीक्षक नीलेशकुमार वाघ, हवालदार दिनकर चव्हाण, संतोषकुमार राठोड, पोलिस कॉन्स्टेबल रमेश शिंदे यांनी वेगवान तपासाद्वारे केली.

तीन दिवसांची पोलिस कोठडी

बाबासाहेब कारभारी भालेराव (रा. महालक्ष्मी हिवरे, ता. नेवासे) व साहेबराव ऊर्फ गोरख कारभारी साठे (वय ३३, रा. ब्राह्मणी), अशी अटक केलेल्या आरोपींची नावे आहेत. राहुरी न्यायालयाने त्यांना तीन दिवसांची पोलिस कोठडी सुनावली.