नगर ः मृग नक्षत्रात जिल्ह्यात पावसाने सर्वदूर हजेरी लावली. त्यामुळे खरीप हंगामाच्या पेरणीला वेग आला असून, जिल्ह्यात एक लाख 23 हजार 700 हेक्‍टरवर पेरणी झाली. त्यातच हवामान खात्याने यंदा दमदार पावसाचे संकेत दिल्याने शेतकरीवर्गात समाधानाचे वातावरण आहे. 

कोरोनाच्या संकटाने मागील तीन महिन्यांपासून जनजीवन विस्कळित झाले. कोरोनामुळे निर्माण झालेले निराशेचे वातावरण यंदा मुहूर्तावर बरसू लागलेल्या मृगधारांनी हटविले आहे. मागील आठ दिवसांपासून कमी-अधिक प्रमाणात जिल्ह्यात मृग नक्षत्राच्या पावसाने हजेरी लावली. त्यामुळे शिवारात खरिपाच्या पेरणीचा उत्सव सुरू आहे. दरम्यान, लॉकडाउनच्या काळातही शेतशिवारामध्ये खरिपाच्या पेरणीपूर्व मशागतीची कामे सुरू होती. जिल्हा प्रशासनाकडून खरीप हंगामाचे नियोजन कोरोनाच्या काळातदेखील दक्षतेने करण्यात आले. 

हेही वाचा ः इतक्या लाख लाेकांना नगरमधून जायचंय बाहेर...

जिल्ह्यात 1 व 3 जूनला रोहिणी नक्षत्राचा पाऊस झाला. त्यानंतर 7 जूनला सुरू झालेल्या मृग नक्षत्राने पहिले तीन दिवस विसावा घेतला. मात्र, मागील आठ दिवसांपासून जिल्ह्यात कमी-अधिक प्रमाणात बरसातीचा उत्सव मांडला. 17 जूनच्या अवधीपर्यंत जिल्ह्यातील नऊ महसूल मंडलांत अतिवृष्टी झाली. मृगाचा पाऊस हा खरीप हंगामासाठी महत्त्वाचा मानला जातो. शेतशिवारात पाऊस झाल्याने जिल्ह्यात खरिपाच्या पेरणीने वेग घेतला. कृषी विभागाने खते, बियाण्यांचा काळाबाजार होऊ नये, यासाठी जिल्ह्यात 15 पथके नेमली आहेत. 

अवश्‍य वाचा ः काेरोनामुक्त कर्जत, पारनेर झाले पुणे, मुंबईकरांमुळे पुन्हा बाधित

शेतकऱ्यांच्या मदतीसाठी तत्पर 
जिल्हाधिकारी राहुल द्विवेदी यांच्या दिशानिर्देशानुसार खरीप हंगामात खते, बियाणे यांची अडचण होणार नाही, याचे नियोजन कृषी विभागाने केले आहे. अहमदनगर जिल्ह्यात एक लाख 23 हजार 700 हेक्‍टर क्षेत्रावर खरिपातील भात, बाजरी, तूर, उडीद, मूग, कपाशी, मका या पिकांची पेरणी झाली. यंदा कृषी विभागाच्या अंदाजानुसार सरासरी चार लाख 79 हजार हेक्‍टरवर पेरणी होणे अपेक्षित आहे. शेतकऱ्यांच्या मदतीसाठी कृषी विभाग तत्पर आहे. 
- विलास नलगे, कृषी उपसंचालक 

जिल्ह्यात झालेली पेरणी 
बाजरी-30 हजार 
मका-दोन हजार 
तूर-नऊ हजार 
मूग-25 हजार 
उडीद-सहा हजार 
सोयाबीन-15 हजार 
कापूस-33 हजार 
(हेक्‍टर)