टाकळी ढोकेश्वर : कान्हूर पठार (ता.पारनेर) येथील पारनेर रोडवरून अज्ञात चोराने ट्रॅक्टर चोरून नेला. मात्र, गावातील तरूणांनी ती घटना पाहिली. त्यांनी संबंधित चोरांचा पाठलाग केला. परंतु त्यानंतर जे घडलं ते अमानुष होतं. त्यामुळे सर्वच शेतकरी, गावकरी हळहळले.

या बाबत माहिती अशी, काल (ता.०७) रोजी पारनेर रोडवर दिनकर सोमवंशी यांच्या घरासमोर त्यांचे पुतणे स्वप्निल सोमवंशी यांचा ट्रॅक्टर (एम एच १६ बी.एम.३०९२) लावण्यात आला होता. मध्यरात्री दोनच्या दरम्यान अज्ञात चोराने ट्रॅक्टरच्या लाईटच्या वायर तोडल्या. घरातील लोकांना आवाज येऊ नये म्हणून त्यांनी ट्रॅक्टर रोडपर्यंत ढकलत नेला. त्यानंतर पोबारा केला. 

हेही वाचा - सावधान, गावाकडे जमीन खरेदी करताय 

तेथील दुचाकीच्यादेखील प्लग व वायर तोडून टाकल्या. जेणेकरून ट्रॅक्टर चोरल्याचे लक्षात आले तरी पाठलाग करता येणार नाही, अशी त्यांची अटकळ होती. 

गावातील तरूणांना आला संशय

गावातील स्वप्निल ठुबे व संतोष नवले नगर येथून रूग्णालयात आपल्या नातेवाइकांना भेटून गावी कान्हुर पठारला घरी निघाले होते. गावात मुख्य चौकात पोहचत असताना त्यांना सोनाई मंगल कार्यालय येथे ट्रॅक्टर जाताना दिसला. एवढ्या मध्यरात्री हा ओळखीचा वाटणारा ट्रॅक्टर कुठे चालला, असा प्रश्न त्यांना पडला. त्यांनी ज्या जागेवर स्वप्निल सोमवंशी यांचा ट्रॅक्टर असतो, त्या जागी जाऊन पाहणी केली. तेथे ट्रॅक्टर दिसला नाही. त्यांनी तात्काळ सोमवंशी यांना संपर्क केला.

चोरांचा पाठलाग

टाकळी ढोकेश्वरमार्गे ट्रॅक्टरच्या मागे गाडीने पाठलाग केला. हाॅर्न देऊही तो थांबत नव्हता. त्यानंतर चोरांना वाटले ट्रॅक्टर काही चोरता येत नाही. त्यामुळे त्यांनी तो ट्रॅक्टर चारीत घालला आणि पसार झाले. 

जनावरांना केली मारहाण

आपला चोरीचा मनसुबा उधळल्याने ते थोड्यावेळाने माघारी फिरले. टाकळी ढोकेश्वर रोडवर स्वप्निल ठुबे यांच्या घरासमोर येऊन ज्या चारचाकीद्वारे आपला पाठलाग करण्यात आला. त्यांच्या चारचाकीच्या (एम एच १६ ए.टी.६४३६) काचा फोडल्या.  ठुबे यांच्या गोठ्यातील जनावरांनाही मारहाण केली. चोरांनी केलेल्या मारहाणीमुळे जनावर हंबरडा फोडत होते, तरीही चोर मारहाण करीतच राहिले. या घटनेने जोतो हळहळतोय. 

या बाबत स्वप्निल सोमवंशी यांनी पारनेर पोलिस ठाण्यात अज्ञात चोरट्यांविरूध्द फिर्याद केली. 

संपादन - अशोक निंबाळकर