अहमदनगर : अहमदनगर व पुणे जिल्ह्यांतून दुचाकी चोरणाऱ्या टोळीला जेरबंद करण्यात स्थानिक गुन्हे अन्वेषण शाखेला यश आले आहे. आरोपी सागर सुदाम जाधव (वय २७), महेश ऊर्फ सुनील बाबासाहेब दारकुंडे (वय २२, दोघे रा. बहीरवाडी, बायजाबाई जेऊर, ता. नगर) यांना अटक करण्यात आली आहे. त्यांच्या ताब्यातून सात लाख ८७ हजार रुपये किमतीच्या, चोरलेल्या दहा दुचाकी हस्तगत करण्यात आल्या आहेत.

अशोक नारायण जाधव (वय ४७, रा. शंकरनगर, ता. पाथर्डी) यांनी घरासमोर लावलेली दुचाकी (एमएच १६ बीई ४४९७) चोरीला गेली होती. त्यांनी दिलेल्या फिर्यादीवरून पाथर्डी पोलिस ठाण्यात गुन्हा दाखल करण्यात आला होता. स्थानिक गुन्हे शाखेचे पोलिस निरीक्षक अनिल कटके यांना सागर जाधव (रा. बहीरवाडी, ता. नगर) याने व त्याच्या साथीदारांनी हा गुन्हा केल्याची माहिती खबऱ्याकडून मिळाली. सहायक पोलिस निरीक्षक सोमनाथ दिवटे यांच्या मार्गदर्शनाखालील पथकाने बहीरवाडी येथे जाऊन आरोपी जाधवला ताब्यात घेतले. महेश दारकुंडे व गौतम पाटील या साथीदारांची नावे त्याने सांगितल्यानंतर पोलिसांनी महेश ऊर्फ सुनील बाबासाहेब दारकुंडेला ताब्यात घेतले. गौतम पाटील मात्र सापडला नाही. पाथर्डी पोलिस ठाण्याचे हवालदार भगवान सानप तपास करीत आहेत.

आरोपींचे पाथर्डी पोलिसांकडे हस्तांतर

आरोपींनी पाथर्डी, अहमदनगर, तसेच पुणे जिल्ह्यातील रांजणगाव एमआयडीसी, शिरूर, शिक्रापूर येथून दुचाकी चोरल्याचे सांगितले. त्यातील विविध कंपन्यांच्या सात लाख ८७ हजार रुपये किमतीच्या दहा दुचाकी काढून दिल्या. आरोपींना मुद्देमालासह पाथर्डी पोलिस ठाण्यात हजर करण्यात आले.