पाथर्डी : बसचालकाला कोरोनाची बाधा झाल्याने चेकेवाडीचे ग्रामस्थ भेदरले आहेत. मुंबई येथे गेलेले बसचालक गावात आले नाहीत. मात्र, तरीही मनात अनामिक भिती आणि आरोग्य व महसुल विभागाने केलेली चौकशी यामुळे गावातील नागरीक व महिला निशब्द झाले आहेत.

गावात कोणी नवीन आले तर ग्रामस्थ कावरे-बावरे होतात. शासनाचे वाहन दिसले तर मग तर काळजात धस्स होते. तहसीलदार नामदेव पाटील यांनी चौदा दिवसासाठी चेकेवाडी गाव सील करण्याचे आदेश बजावले आहेत.

हेही वाचा - त्यांना आम्ही मुख्यमंत्र्यांच्या पाया पडताना पाहिलंय - थोरातांचा विखे पाटलांवर हल्ला

चेकेवाडी येथील 34 वर्षीय युवक मुंबई येथे एसटी चालकाचे काम करतात. लाँकडाऊनमधे ते गावी चेकेवाडी येथे होते. आठ जून 2020 रोजी मुंबई येथे कामावार हजर होण्यासाठी गेले. तेथे कर्तव्यावर असताना त्यांच्या काही सहका-यांना कोरोनाची बाधा झाली.

ते जेथे राहत होते तेथेही जवळच्या मित्रांना कोरोनाची बाधा झाली. बसचालक यांनाही श्वसनाचा त्रास सुरु झाला. ते खाजगी टँकरमधुन पाथर्डीला आले. येथे आल्यानंतर त्यांनी डॉ. भगवान दराडे यांना दुरध्वनीवरुन त्रास होत सांगितले. त्यांना तातडीने नगरला पाठविले. तेथे ते कोरोना पाँझिटीव्ह असल्याचे उघड झाले. चेकेवाडी येथे नागरीक भयभीत झाले आहेत.

पाँझिटीव्ह रुग्ण गावात आलेला नसला तरीही कोरोनाची भिती सर्वांच्या चेह-यावर आहे. गाव सील करण्याचे आदेश तहसीलदार नामदेव पाटील यांनी दिले आहेत. कोरोनाची बाधा झालेल्या रुग्णाच्या संपर्कात गावातील मुंबई येथे असलेले काही टँकर चालक आले असल्याची माहिती समजली आहे.

ते ग्रामस्थांच्या दूरध्वनीवरुन संपर्कात आहेत. त्यांनाही काळजी वाटते आहे. गावातील लोकांची तपासणी करण्यात येणार आहे. घरोघरी जाऊन आरोग्य विभागाचे कर्मचारी आजारी माणसांची माहिती घेणार आहेत.

चेकेवाडी गाव चौदा दिवसासाठी सील करण्यात आले आहे. कोरोना रुग्ण जरी गावाच्या संपर्कात आला नसला तरी आपल्याला काळजी घ्यावी लागेल. कोरोनाचा प्रसार रोखण्यासाठीची उपाययोजना करावीच लागते. नागरीकांनी काळजी घ्यावी.

- नामदेव पाटील, तहसीलदार, पाथर्डी.