अकोला : जिल्ह्यात पर्यावरण संरक्षण राखण्याच्या दृष्टीने प्लास्टीक कचरा व्यवस्थापन, प्लास्टर ऑफ पॅरीस वापरास प्रतिबंध या आदेशांची प्रभावी अंमलबजावणी करण्यासाठी गाडगेबाबा सामाजिक प्रतिष्ठान अकोला या संस्थेची नियुक्ती करण्यात आली आहे. यासंदर्भात आदेशाचे उल्लंघन करणाऱ्यांविरुद्ध करावयाच्या कारवाईचे स्वरुपही जिल्हाधिकारी निमा अरोरा यांनी गुरुवारी निर्गमित केले. येत्या ता.१ मेपासून या कायद्याची अंमलबजावणी जिल्ह्यात सुरू होईल, असेही आदेशात नमूद करण्यात आले आहे.

त्या दृष्‍टीने प्‍लास्‍टीक पिशव्‍या, नायलॉन मांजाचा वापर, प्‍लास्‍टर ऑफ पॅरीसचा वापर इ. मुळे प्राण्‍यांवर व पर्यावरणावर होणारे दुष्‍परिणाम इत्‍यादीवर केंद्र शासनाच्या प्राणी क्लेष प्रतिबंधक अधिनयम, १९६० मधील तरतूदींची प्रभावी अंमलबजावणी करण्यासाठी अकोला जिल्‍ह्यामध्‍ये प्राणी क्लेष प्रतिबंधक समितीची जिल्‍हाधिकारी तथा जिल्‍हादंडाधिकारी यांचे अध्‍यक्षतेखाली स्‍थापना करण्‍यात आली आहे.

जिल्ह्यात ७५ मायक्रॉन पेक्षा कमी जाडीच्‍या प्‍लास्‍टीक पिशव्‍या, नायलॉन मांजाचा वापर, त्‍याच प्रमाणे प्‍लास्‍टर ऑफ पॅरीसच्‍या मूर्ती यांची आयात, साठवणूक, उत्पादन ,वितरण व विक्री आणि खरेदी/वापर करणाऱ्या प्रतिष्‍ठान, व्‍यक्‍ती इत्यादींवर कारवाई करण्यात येणार आहे. त्यासाठी गाडगेबाबा सामाजिक प्रतिष्‍ठान, अकबर प्‍लॉट, अकोट फैल, अकोला या संस्‍थेची नियुक्‍ती करण्‍यात आली आहे.

दर आठवड्याला अहवाल

उप आयुक्‍त, पशूसंवंर्धन अधिकारी अकोला यांनी केलेल्‍या कार्यवाहीचा अनुपालन अहवाल दर आठवड्याच्‍या शुक्रवारी सादर करावा लागणार आहे. प्रादेशिक अधिकारी, प्रदूषण नियंत्रण मंडळ अकोला यांनी जप्‍त करण्‍यात आलेल्‍या साहित्‍याची नियमानुसार विल्‍हेवाट लावावी. संबंधित तहसीलदार तथा तालुका दंडाधिकारी यांनी त्‍यांचे कार्यक्षेत्रामध्‍ये एसपीसीए यांचे प्रतिनिधी यांना आवश्‍यक ते सहकार्य करण्याचे आदेश जिल्हाधिकाऱ्यांनी दिले आहेत.

कुणाला करता येईल कारवाई?

एसपीसीए अंतर्गत नियुक्‍त केलेले प्रतिनिधी ज्‍यांचेजवळ कार्यालयाने निर्गमित केलेले ओळखपत्र आहे, अशा प्रतिनिधींना दंडनीय तसेच आवश्‍यक साहित्‍य जप्‍त करण्‍याची कारवाई करता येईल. दंडनीय तसेच साहित्‍य जप्‍त करण्‍याचे कारवाईत अडथळा नि‍र्माण केल्‍यास, संबंधीतांविरुध्‍द नियमानुसार फौजदारी कारवाई करण्‍यात येईल.