कारंजा : ध्यास युवती महिला बचत गट "माय पॅड माय राईट" या प्रकल्पांतर्गत सॅनेटरी पॅडची निर्मिती कारंजा शहरात करत आहे. आज यावर्दी येथील धाबेकर महाविद्यालय येथे आयोजित कार्यक्रमात ध्यास संस्थेच्या अध्यक्षा पुनम बंग यांनी मार्गदर्शन केले.

यामध्ये पुनम बंग यांनी मासिक पाळी या विषयावर बोलताना विद्यालयातील विद्यार्थिनींना सांगितले की, मासिक पाळी ही विटंबना नसून एक वरदान आहे. "ज्या प्रमाणे एका स्त्रिला जर मासिक पाळी आली नाही तर लोक तिला स्वीकारत नाही. मग जी गोष्ट आपल्याला एका स्त्रीचे अस्तित्व प्रदान करते, ती विटंबना होऊच शकत नाही.

मासिक पाळीबाबत स्त्री घरातील पुरुषांपासून बऱ्याच गोष्टी लपवते. मात्र त्यांच्यापासून लपविण्यापेक्षा होणाऱ्या त्रासाची माहिती त्यांना देणं हे आपले कर्तव्य आहे." असे पुनम म्हणाल्या. सोबतच मासिक पाळीत वापरल्या जाणाऱ्या पॅडची योग्य विल्हेवाट कशी लावावी, याबद्दलही मार्गदर्शन करण्यात आले. तसेच ध्यास बचत गटाच्या माध्यमातून निर्मित पॅड विद्यार्थिनींना मोफत वाटण्यात आले.

यावेळी ध्यास संस्थेच्या सचिव धाबेकार यांनी विद्यालयाचे मुख्याध्यापक विजय भड व शिक्षक वृंद, ध्यास संस्थेच्या अध्यक्षा पुनम बंग, एमआरसी अध्यक्षा पुनम कदम, सी आर पी. सुवर्णा व वक्ते यांचे आभार मानले.