अकोला : महानगरपालिकेला लोकशाहीर अण्णा भाऊ साठे नागरी वस्ती सुधार योजनेतून २५ कोटी रुपायांचा निधी मिळाला होता. हा निधी महाविकास आघाडी सरकारने अकोट आणि बाळापूर नगरपालिकेकडे वळती करण्याचा आदेश ता. १३ सप्टेंबर रोजी दिला आहे. महानगरपालिकेची निवडणूक अवघ्या काही महिन्यांवर असताना महाविकास आघाडीने मनपातील सत्ताधारी भाजपला निधी वळता करून मोठा फटका दिला आहे. त्यामुळे राजकारणाच्या प्रवाहात महानगरपालिकेने सादर केलेले ३७ कोटी रुपयांचे प्रस्ताव ‘बुडणार’ आहेत.

राज्यातील सत्ताधारी महाविकास आघाडीतील घटक पक्ष शिवसेना व अकोला महानगरपालिकेतील सत्ताधारी भाजप या एकेकाळच्या दोन मित्र पक्षांमध्ये सध्या हाडाचे वैर निर्माण झाले आहे. प्रत्येक पातळीवर शिवसेना व भाजप एकमेकांना अडचणीत आणण्याची कोणतीही संधी सोडत नसल्याचे अलीकडच्या काही घटनांवरून स्पष्ट होते. अकोला महानगरपालिकेतील सत्ताधारी भाजपलाही शिवसेनेच्या या राजकारणाचा पदोपदी सामना करावा लागत आहे. त्याचा प्रत्यय लोकशाहीर अण्णा भाऊ साठे नागरी दलित वस्ती सुधार योजनेच्या निधीवरून पुन्हा एकदा आला आहे.

जिल्हा वार्षिक योजना अनुसुचित जाती उपाययोजनेंतर्गत लोकशाहीर अण्णाभाऊ साठे नागरी वस्ती सुधार योजनेतून सन २०२०-२१ या वर्षाकरिता अकोला महानगरपालिकेला २५ कोटी रुपयांचा निधी देण्यात आला होता. हा निधी मनपाकडे वळताही करण्यात आला होता. त्यातून मनपाने ३७ कोटी रुपयांच्या कामांचे प्रस्ताव शासनाकडे सादर केले होते. समाजकल्याण विभागाकडून प्रस्तावांना मंजुरीही मिळाली होती. त्यामुळे या प्रस्तावित कामांना मनपा निवडणुकीपूर्वी सुरुवात होईल, अशी अपेक्षा होती. मनपाकडून कामे सुरू करण्यासंदर्भात नियोजन सुरू असतानाच ता. १३ सप्टेंबर रोजी नगर विकास विभागाचे पत्र अकोला जिल्हाधिकाऱ्यांना मिळाले. या पत्रातून मनपाला मिळालेल्या २५ कोटीच्या निधीचे पुनर्विनियोज करून हा निधी अकोट व बाळापूर नगर परिषदेकडे वळती करण्यात आला आहे.

अकोटला १४, बाळापूरला ११ कोटी

लोकशाहीर अण्णाभाऊ साठे नागरी वस्ती सुधार योजनेचा अकोला महानगरपालिकेचा वळती करण्यात आलेल्या निधीतून अकोट नगर परिषदेला १४ कोटी रुपये तर बाळापूर नगर परिषदेला ११ कोटी रुपये देण्यात आले आहे.

पालकमंत्री, आमदारांची भूमिका ठरली निर्णायक

अकोला महानगरपालिकेतील सत्ताधारी भाजपला फटका देणारा निर्णय घेताना अकोला जिल्ह्याचे पालकमंत्री बच्चू कडू व बाळापूरचे आमदार नितीन देशमुख यांची भूमिका निर्णायक ठरली असल्याची चर्चा राजकीय वर्तुळात रंगत आहे. पालकमंत्री प्रहार जनशक्ती पक्षाच्या माध्यमातून अकोट विधानसभा मतदारसंघावर लक्ष केंद्रीत करीत आहेत तर शिवसेनेचे आमदार नितीन देशमुख यांनी त्यांच्या बाळापूर मतदार संघासाठी निधी पळविला असल्याची चर्चा आहे.

महानगरपालिकेला पालकमंत्र्यांनी २५ कोटी रुपयांचा निधी दिला होता. त्‍यांनीच तो परत घेतला आहे.

- विजय अग्रवाल, माजी महापौर, अकोला

लोकशाहीर अण्णाभाऊ साठे नागरी वस्ती सुधार योजनेतून मनपाने ३७ कोटीचे प्रस्ताव सादर केले आहेत. मनपाला मिळालेल्या २५ कोटीचा निधी वळता केल्याची चर्चा आहे. मात्र, अधिकृतपणे महानगरपालिकेला कोणतेही पत्र मिळाले नाही.

- अजय गुजर, कार्यकारी अभियंता, मनपा, अकोला