धाड (बुलडाणा) : परिसरात झालेल्या अवकाळी पावसासह वादळी वार्‍यामुळे पिकांचे नुकसान झाले असून, काही ठिकाणी गारपीट झाल्यामुळे रब्बी पिकांचे अतोनात नुकसान झाले आहे. अनेक व्यापार्‍यांच्या दुकानाचे टीनपत्रे उडून गेल्यामुळे साहित्य ओले झाल्यामुळे लाखो रुपयांचे नुकसान झाले असून, महसूल विभागाने तत्काळ पंचनामा करुन नुकसान भरपाईची मागणी केली आहे.

चांडोळ येथे अवकाळी पावसामुळे घरावर पडली वीज
 
वादळी वार्‍यासह जोरदार पाऊस आल्यामुळे धाडसह करडी, सावळी, बोरखेड येथील शेतकर्‍यांचे रब्बी पिकांचे नुकसान झाले. अनेक शेतकर्‍यांनी शेतामधील पिके शेतातच ठेवली होते. तर काही ठिकाणी रब्बी पिके यामध्ये मका, गहू यांची सोंगणी बाकी होती. मात्र, आलेल्या जोरदार वार्‍यासह पावसामुळे रब्बी पिकांचे नुकसान झाले. धाड येथील दिगांबर जाधव यांची ५ एकर मक्का जमीनदोस्त झाली. करडी व सावली येथे गारपीट झाल्यामुळे कांदाबीज या पिकांचे नुकसान झाले. रस्त्यावर अनेक झाडे पडली तर काही व्यापार्‍यांच्या दुकानावरील टीनपत्रे उडून गेल्यामुळे साहित्य ओले होऊन नुकसान झाले. हातातोंडाशी आलेला घास हिरावल्या गेल्यामुळे महसूल विभागाने तातडीने पंचनामा करुन नुकसान भरपाई देण्याची मागणी परिसरात होत आहे. 

जिल्ह्यात अवकाळीचा तांडव; वीज पडल्याने महिलेचा मृत्यू

रब्बी हंगामातील पाच एकर मका ही वादळी वार्‍यामुळे संपूर्णपणे जमीनदोस्त झाली आहे. त्यामुळे मोठ्या प्रमाणात नुकसान झाले असून, आता जनावरांच्या चार्‍याचा सुद्धा प्रश्‍न निर्माण झाला आहे. महसूल विभागाने याबाबत पंचनामा करुन मदत करावी. 
- दिगांबर अश्रुबा जाधव, शेतकरी, धाड.