गडचिरोली : जिल्ह्यात मंगळवारी (ता. २४) तब्बल सहा डेल्टा प्लस रुग्णांची नोंद करण्यात आली आहे. कोरोना विषाणूच्या या नव्या रूपाचे रुग्ण सापडल्याने अधिक काळजी घेण्याची गरज निर्माण झाली आहे.

जिल्ह्यात ५६९ कोरोना तपासण्यांपैकी ८ नवीन कोरोना बाधित आढळून आले. तसेच मंगळवारी दोन जणांनी कोरोनावर मात केल्याने रुग्णालयातून घरी सोडण्यात आले. त्यामुळे जिल्ह्यात आतापर्यंत बाधित ३० हजार ६८९ पैकी कोरोनामुक्त झालेली संख्या २९ हजार ९१५ वर पोहोचली आहे. तसेच सध्या २८ सक्रिय कोरोना बाधितांवर उपचार सुरू आहेत.

आतापर्यंत जिल्ह्यात कोरोनामुळे एकूण ७४६ जणांचा मृत्यू झाल्याची नोंद आहे. त्यामुळे जिल्ह्यातील कोरोना रुग्ण बरे होण्याचे प्रमाण ९७.४८ टक्के, सक्रिय रुग्णांचे प्रमाण ०.०९ टक्के तर मृत्यू दर २.४३ टक्के झाला आहे. दरमहा काही नमुने तपासणीसाठी पुणे येथील केंद्रीय प्रयोगशाळेत पाठविले जातात. यातील सहा नमुने कोरोनाच्या नवीन डेल्टा प्लसचे आढळून आल्याचा अहवाल प्राप्त झाला आहे.

या अहवालांमध्ये चामोर्शी तालुक्यात ३, गडचिरोली १ व अहेरी तालुक्यात २ रुग्ण आढळून आले आहेत. याबाबत आरोग्य विभागाने नागरिकांनी घाबरून न जाण्याचे आवाहन केले आहे. कोरोनाबाबत दिलेल्या विविध आवश्यक उपाययोजनांची अंमलबजावणी नागरिकांनी करावी, असे आवाहनही विभागाने केले आहे. नवीन ८ बाधितांमध्ये गडचिरोली तालुक्यातील ३, चामोर्शी तालुक्यातील २, मुलचेरा तालुक्यातील २, सिरोंचा तालुक्यातील एकाचा समावेश आहे.