अकोला : निंभोरा कोल्हापुरी बंधाऱ्याचे काम तातडीने पूर्ण करा तसेच शेतीच्या वाहितीसाठी ग्रामस्थांना रस्त्याचे बांधकाम करून देण्यासाठी आमदार रणधीर सावरकर यांनी निंभोरा येथील कोल्हापुरी बंधाऱ्याच्या भेटी दरम्यान अधिकाऱ्यांना सूचना केल्या.

निंभोरा येथील बंधाऱ्याच्या कामाचा आढावा घेण्यासाठी जिल्‍हा जलसंधारण अधिकारी गीते, उपविभागीय जलसंधारण अधिकारी वानरे, शासकीय कंत्राटदार तसेच स्‍थानिक ग्रामस्‍थांसमवेत ४ फेब्रुवारी २०२२ रोजी प्रत्‍यक्ष भेटी दरम्‍यान कामाच्‍या प्रगतीची पाहणी आमदार रणधीर सावरकर यांनी केली.

हा बंधारा खारपाणपट्ट्यात येत असल्‍याने तो पावसाळ्यात पुराच्या पाण्‍यात स्‍थिर राहावा याकरिता बंधाऱ्याच्‍या की वाल, वींग वाल आवश्‍यकते प्रमाणे वाढविण्‍यात याव्‍यात. बंधाऱ्यापासून गावाकडे असणारा तसेच पैल तिरावरील जाणारा रस्‍ता अशा आवश्‍यक असलेल्‍या किमान ५०० मीटर लांबीमध्‍ये रस्‍त्‍याचे बांधकाम करण्‍यात यावे. बंधाऱ्याचे उर्ध्वबाजूस १००० मीटर लांबीमध्‍ये रुंदीकरण व खोलीकरण करण्‍यात यावे तसेच बंधाऱ्याच्या खालील बाजूस किमान ३०० मीटर लांबीमध्‍ये रुंदीकरण व खोलीकरण करण्‍यात यावे.

उपरोक्त कामांच्या प्रस्तावाला शासन स्तरावरून तातडीने मान्यता घेऊन कामे पूर्ण करण्यात यावीत, असे निर्देश भेटी दरम्यान आमदार रणधीर सावरकर यांनी दिले. भेटीदरम्यान ज्येष्ठ समाजिक कार्यकर्ते महादेवराव भुईभार, जिल्हा परिषद सदस्य तुकाराम दाबेराव, उपसरपंच अतुल आवारे, ताथोड गुरुजी, राजेश भुईभार, भरत काळमेघ, विनय भटकर, गणेश काळमेघ, राजेश भुईभार, केशव ताठे, गजानन राजभाट, रमेश ताठे, मनोज गावंडे, प्रमोद भुईभार, शरद ताथोड, लव भटकर आदी उपस्थित होते.