अकोला : महाराष्ट्र राज्य रुग्णसेवक व श्रमिक कामगार संघटनेचे अध्यक्ष प्रवीण भोटकर यांनी पारस येथे सौर ऊर्जा प्रकल्प न करता औष्णिक विद्युत प्रकल्पाचे विस्तारीकरण करण्याची मागणी ऊर्जा मंत्री नितीन राऊत यांच्याकडे लावून धरली होती. ऊर्जा मंत्र्यांनी यासंदर्भात मंत्रालयात बैठकीचे आयोजन केल्याची माहिती भोटकर यांनी दिली आहे.

प्रवीण भोटकर यांनी बेरोजगारांना रोजगार देणाऱ्या पारस औष्णिक विद्युत प्रकल्पाचे विस्तारीकरण करावे यासाठी ऊर्जा मंत्र्यांना निवेदन दिले होते. पारस येथील औष्णिक विद्युत प्रकल्पाचे विस्तारीकरण करण्यासाठी प्रकल्पालगतची शेती शासनाने सात वर्षांपूर्वीच अधिग्रहित केली. परंतु, त्यावर औष्णिक विद्युत प्रकल्पाऐवजी सौर ऊर्जा प्रकल्प निर्मितीचा घाट घातला जात असल्याने शासन शेतकऱ्यांची फसवणूक करत असल्याची तक्रार भोटकर यांनी ऊर्जा मंत्र्यांकडे केली होती. त्याची दखल घेत ऊर्जामंत्र्यांनी एका महत्वपूर्ण बैठकीचे आयोजन १ फेब्रुवारी रोजी मंत्रालयात केल्याची माहिती भोटकर यांनी दिली.

या बैठकीला आमदार नितीन देशमुख व प्रवीण भोटकर यांना निमंत्रित करण्यात आले असून, प्रशासनातर्फे ऊर्जा विभागाचे प्रधान सचिव तथा व्यवस्थापकीय संचालक महापारेषण, मंत्रालयातील ऊर्जा विभागाचे संबंधित सहसचिव व उपसचिव, महानिर्मिती व महावितरणचे अध्यक्ष तथा व्यवस्थापकीय संचालक, मुख्य कार्यकारी अधिकारी जि.प. अकोला यांना उपस्थित राहण्याचे आदेश देण्यात आले आहेत. महासंचालक महाऊर्जा पुणे, संचालक महानिर्मिती व महावितरण, प्रादेशिक संचालक नागपूर महावितरण, मुख्य अभियंता जलजीवन मिशन अमरावती, अधीक्षक अभियंता जलजीवन मिशन अकोला, मुख्य अभियंता औष्णिक विद्युत प्रकल्प पारस व अकोला हे व्हिडीओ काँफरन्सिंगद्वारे बैठकीला उपस्थित राहणार असल्याचेही महाराष्ट्र राज्य रुग्णसेवक व श्रमिक कामगार संघटनेद्वारे कळविण्यात आले आहे.