मेहकर : भरधाव खासगी बसने बुलडाणा ते अहमदपूर धावणाऱ्या या एसटी बसला जोरदार धडक दिल्याने एक महिला जागीच ठार झाली. तर दोन जण जखमी झाले. ही घटना आज ४ मे रोजी सकाळ मेहकर चिखली मार्गावर नांद्रा धांडे फाट्याजवळ घडली. अंजली गोपाल शर्मा (वय २६, रा. चिखली) असे मृत महिलेचे नाव आहे.

अहमदपूर ते बुलडाणा बस क्रमांक एमएच २० बीएल २३७७ ही मेहकरकडे येत होती. दरम्यान, नांद्रा धांडे फाट्याजवळ पाठीमागून भरधाव येणाऱ्या खासगी बस क्रमांक एआर २०-९२०० ने एसटी बसला जोरदार धडक दिली.

या अपघातात अंजली गोपाल शर्मा यांचा जागीच मृत्यू झाला. तसेच एसटी बसमधील मुरलीधर नारायण इंगळे (वय ६७, रा. बुलडाणा) आणि खासगी बसमधील प्रवासी महादेव गोपाल उबाळे (रा. रिसोड, जिल्हा वाशिम) हे जखमी झाले आहेत. जखमींना मेहकर येथील ग्रामीण रुग्णालयात भरती करण्यात आले.मृतक महिला या परभणीला जात असल्याचे समजते.

घटनेची माहिती मिळताच वरिष्ठ सहायक कार्यशाळा अधीक्षक राहुल देशमाने, एसटी निरीक्षक समाधान जुमडे, लिपिक प्रवीण तांगडे यांनी घटनास्थळी जाऊन पंचनामा केला. अपघातातील मृतकांच्या नातेवाईकास दहा हजार तर,

जखमींना पाच हजार रुपयांची तातडीची मदत देण्यात आली. यावेळी मेहकर पोलिस ठाण्याचे सहायक फौजदार रमेश बाजड, हेड कॉन्स्टेबल शिवानंद केदार आणि पोलिस कर्मचारी यांनी घटनास्थळी येऊन मदत केली. वृत्त लिहिस्तोवर या प्रकरणी मेहकर पोलिस ठाण्यात गुन्हा दाखल करण्यात आला नव्हता.