Ramdas Athwale RPI: रिपब्लिकन पार्टी ऑफ इंडिया (आठवले) या पक्षाचे सर्वेसर्वा केंद्रीय राज्यमंत्री रामदास आठवले १५ जानेवारीला अकोला जिल्हा दौऱ्यावर येत आहे. त्यांच्या दौऱ्यापूर्वीच अकोला जिल्ह्यात आरपीआयमधील मतभेद उफाळून आले आहे. जिल्हा महासचिवासह शेकडो कार्यकर्ते दौरा कार्यक्रमाच्या तयारीवरून नाराजी व्यक्त करीत राजीनामा देणार आहेत.

आरपीआयचे जिल्हाध्यक्ष सुनील अवचार हे पक्षात मनमानी करीत असून, पक्षाचे कार्यक्रम घेताना जिल्ह्यातील सर्व कार्यकर्त्यांना विश्वासात घेतले जात नसल्याचा आरोप जिल्हा महासचिव पद्‍माकर वासनिक यांनी केले आहे. मागील दोन महिन्यात जिल्ह्यात तीन महासचिव पदांच्या नियुक्ती करण्यात आल्या आहेत.

नियुक्तीनंतर तीन वर्षे पदावरून काढता येत नाही, असे पक्षाच्या घटनेत नमुद असल्याचे महासचिव वासनिक यांनी दिलेल्या पत्रात म्हटले आहे. रामदास आठवले यांच्या दौऱ्या कार्यक्रमात महानगराध्यक्ष गजानन कांबळे यांचा कुठेही उल्लेख करण्यात आला नसल्याचा आरोपही वासनिक यांनी केला आहे. त्यामुळे कार्यकर्ते संभ्रमात असून, राजीनामा देण्याच्या तयारीत असल्यची माहिती वासनिक यांनी दिली. (Latest marathi News)

वासनिक यांना दोन महिन्यापूर्वीच पदमुक्त केले - अवचार
जिल्हा महासचिव पद्‍माकर वासनिक यांच्यासह शेकडो कार्यकर्ते राजीनामा देण्याच्या तयारी असल्याबाबात आरपीआयचे अकोला जिल्हाध्याक्ष सुनील अवचार यांच्याकडे विचारणा केली असता पद्‍माकर वानसिक यांना दोन महिन्यापूर्वीच पदमुक्त केले असल्याचे त्यांनी सांगितले. वासनिक हे पक्ष विरोधी कारवायात सहभागी होते. त्यांनी मूर्तिजापूर तालुक्यात पक्षाचे कार्यक्रम राबविण्यात अडचणी आणल्याने त्यांना पदमुक्त केले असल्याचे अवचार म्हणाले