अकोला : धर्मदाय आयुक्त कार्यालयामध्ये ता. ६ मे २०१९ रोजी दुपारी १२ वाजता समाजसेवक किसनराव हुंडीवाले यांची विक्रम श्रीराम गावंडे, श्रीराम कसदन गावंडे, रणजित श्रीराम गावंडे, प्रवीण श्रीराम गावंडे, धीरज प्रल्हाद गावंडे, सूरज प्रल्हाद गावंडे, सतीश सुखदेव तायडे, विशाल सुखदेव तायडे, मयूर गणेशलाल अहिरे, दिनेश ठाकूर, प्रतीक दत्तात्र तोंडे आणि साबीर यांनी निर्घृण हत्या केली होती.

या प्रकरणातील दोन आरोपी धीरज प्रल्हाद गावंडे आणि सूरज प्रल्हाद गावंडे यांना चार वर्षे चार महिने कारागृहामध्ये राहिल्यानंतर सर्वोच्च न्यायालयाने सोमवारी जामीन मंजूर केला. आता या प्रकरणात केवळ दोन आरोपी कारागृहातमध्ये असून, इतर आरोपींना जामीन मिळाला आहे.

महाराष्ट्रात अत्यंत गाजलेल्या या प्रकरणात कारागृहात असलेल्या आरोपींनी ता. ६ सप्टेंबर २०२३ रोजी जामिनासाठी सर्वोच्च न्यायालयात धाव घेतली होती.

या प्रकरणात न्यायालयाने, कोणताही व्यक्ती केवळ ट्रायलच्या वेळकाढूपणामुळे जर करागृहामध्ये असेल तर हे न्याय सांगत नसल्याचे म्हटले आहे. त्याच आधारावर दोन आरोपींना सोमवारी जामीन मंजूर करण्यात आला. याआधी मुख्य आरोपीलाही जमीन मंजूर झालाआहे, हे विशेष.

सर्वोच्च न्यायालयाने दिल्लीचे ॲड. मनोज गोरकेला यांनी आरोपींची बाजू सर्वोच्च न्यायालयात मांडली. या प्रकरणात विशेष सरकारी वकील ॲड. उज्ज्वल निकम प्रत्येक तारखेवर मुंबईहून अकोल्यात येत असून, हुंडीवाले हत्याकांडातील सरकारची बाजू ते न्यायालयात मांडत आहेत.