अकोला जिल्ह्यातील पारस येथे रविवारी टिनशेडवर झाड पडून सात जणांचा मृत्यू झाला, तर ३५ जण जखमी झाले. अकोल्यातील पारस गावात हा अपघात झाला.

बाबूजी महाराज संस्थान येथे एका धार्मिक कार्यक्रमासाठी सुमारे ४० जण गेले होते. सायंकाळी सातच्या सुमारास येथे मुसळधार पाऊस सुरू झाला आणि जोरदार वारे वाहू लागले. त्यामुळे एक झाड उन्मळून पडून टिनाच्या शेडवर पडले ज्याखाली सर्व भाविक जमले होते. यातील ४ जणांचा जागीच मृत्यू झाला, तर ३५ जणांना रुग्णालयात दाखल करण्यात आले. जखमींपैकी ३ जणांचा उपचारादरम्यान मृत्यू झाला

दरम्यान या प्रकरणी धक्कादाय माहिती समोर आली आहे. या सर्व मृत्यूंना अंधश्रद्धा आणि अघोरी उपचार जबाबदार आहेत, असा आरोप अंधश्रद्धा निर्मूलन समितीने केला आहे. राज्यभरातून या ठिकाणी शारीरीक आणि मानसिक व्याधी असणारे जवळपास ४ ते ५ हजार रुग्ण उपचारासाठी येतात. (Akola News)

काल देखील संस्थानकडून या रुग्णांवर लिंबू आणि अंगारा देऊण किंवा लिंबू डोळ्यामध्ये टाकून अघोर उपचार करण्यात येत होते, स्थानिक ग्रामस्थांनी ही माहिती दिली आहे. संस्थानचे अध्यक्ष मोतीराम इंगळे यांनी देखील ही बाब मान्य केली आहे. याबाबत एबीपी माझाने वृत्त दिले आहे.

अंधश्रद्धा निर्मूलन समितीचे अकोलाचे अध्यश शरद वानखेडे म्हणाले, "काल बाबूजी संस्थान येथे जी नैसर्गिक दुर्घटना झाली. त्यात ७ लोकांचा बळी गेली, ही अतिशय  दुःखदायक घटना होती. या घटनेच्या बाबतीत मागचा इतिहास पाहीला तर हे ७ बळी अंधश्रद्धचे बळी आहेत."

"अनेक लोक सांगतात की दर आठवड्याला या ठीकाणी दरबार भरत होता. या ठिकाणी अघोरी उपचार होत होते. त्यामुळे जादूटोणा कायद्याअंतर्गत संबंधित व्यक्तीवर कारवाई करावी," अशी मागणी अंनिसते शरद वानखेडे यांनी केली आहे.