नवी दिल्ली - माहिती तंत्रज्ञान कंपनी ‘विप्रो’चे संस्थापक अझीम प्रेमजी यांनी दानशूर लोकांच्या यादीत प्रथम क्रमांक मिळविला आहे. दिवसाला २२ कोटी आणि एका वर्षात ७९०४ कोटी रुपयांची देणगी देऊन प्रेमजी या वर्षातील सर्वांत दानशूर भारतीय ठरले आहेत.

हुरुन रिपोर्ट इंडिया आणि अ‍ॅडलजीव्ह फाउंडेशनच्या अहवालानुसार, प्रेमजी यांनी एचसीएल टेक्नॉलॉजीजच्या शिव नाडर यांना मागे टाकले आहे, जे यापूर्वी दानशूर व्यक्तींच्या यादीत पहिले होते. आर्थिक वर्ष २०२० मध्ये नाडर यांनी ७९५ कोटी रुपये दान केले, तर मागील वर्षी त्यांनी ८२६ कोटी रुपये दान केले.

हे वाचा - देशात तांत्रिक आर्थिक मंदी?; दुसऱ्या तिमाहीतही विकास दरात घसरण

प्रेमजी यांनी यापूर्वी २०१८-१९ या आर्थिक वर्षात ४२६ कोटी रुपये दान केले होते. परंतु, यावर्षी त्यांनी सर्व विक्रम मोडले. भारतीय उद्योजकांनी यंदा आर्थिक देणग्या १७५ टक्क्यांनी वाढवून १२,०५० कोटी रुपयांवर नेल्या. ‘विप्रो’च्या प्रवर्तकांमध्ये अझीम प्रेमजी एन्डोमेंट फंडचा १३.६ टक्के हिस्सा आहे आणि प्रवर्तकांचा हिस्सा म्हणून मिळणारी संपूर्ण रक्कम घेण्याचा अधिकार हा निधी राखून ठेवतो.