मुंबई - सेन्सेक्स (Sensex) आणि निफ्टिच्या (Nifty) निर्देशांकात सत्राच्या सुरुवातीला मोठी वाढ झाल्याचं दिसून आलं. सेन्सेक्स आणि निफ्टिच्या निर्देशांकात मंगळवारी सकाळच्या सत्रात तब्बल 1 टक्क्याहून अधिक वाढ झाली. भारतासह (India) जगात कोरोना रुग्णांची संख्या वाढत असल्याचं दिसत आहे. त्याचा परिणाम शेअर मार्केटवरही (Share Market) होताना दिसतोय. गेल्या चार दिवसांपासून भारतातील कोरोना (Corona) रुग्णांची संख्या कमी होत असून शेअर मार्केटवर सकारात्मक असा परिणाम होत आहे.

मंगळवारी सकाळी सेन्सेक्समध्ये 640 अंशांची वाढ झाली. यामुळे सेन्सेक्सने विक्रमी 50 हजारांचा टप्पा पार केला. तर निफ्टितही तब्बल 193 अंशांची वाढ झाल्यानं निर्देशांक 15 हजारांच्या वर पोहोचला.

गेल्या 24 तासात देशात कोरोनाचे नवीन 2 लाख 63 हजार इतके रुग्ण सापडले. गेल्या आठवड्यात हाच आकडा तीन ते चार लाखांच्या दरम्यान होता. मात्र या आठवड्याच्या सुरुवातीला तो तीन लाखांच्या आत आल्यानंतर सेन्सेक्स आणि निफ्टिचे निर्देशांक वाढल्याचं दिसतं. एका बाजुला नवीन रुग्णांचा आकडा कमी होत असला तरी मृत्यूची संख्या मात्र अद्याप घटलेली नाही. तर सक्रीय रुग्णांची घटणारी संख्या हीसुद्धा दिलासा देणारी बाब आहे.

एचडीएफसी बँक, आयसीआयसीआय बँक, रिलायन्स इंडस्ट्रीज (आरआयएल), बजाज फायनान्स आणि हौसिंग डेव्हलपमेंट फायनान्स कॉर्पोरेशन (एचडीएफसी) यांच्या निर्देशांकात आज वाढ दिसली. यामुळेच आज सेन्सेक्समध्ये विक्रमी उसळी पहायला मिळाली. या कंपन्यांच्या शेअर्सच्या किंमतीत वाढ दिसून आली आहे.