मुंबई : वेगवेगळ्या प्रकारचे खाद्यान्न व खाद्यपदार्थांचे उत्पादन (food production) करणाऱ्या गोदरेज अॅग्रोव्हेट या कंपनीचे (Godrej agrovet company) या आर्थिक वर्षाच्या दुसऱ्या तिमाहीतील तसेच सहामाहीतील उत्पन्न वाढले (income increases) असून नफा स्थिर राहिला आहे. जुलै ते सप्टेंबर या तिमाहीतील त्यांचे उत्पन्न 2,159 कोटी रुपये झाले, ते मागीलवर्षीच्या याच तिमाहीतील उत्पन्नापेक्षा (1,722 कोटी रु.) 25 टक्के जास्त आहे. तर यावर्षीच्या एप्रिल ते सप्टेंबर या सहामाहीत त्यांना 4,162 कोटी रुपये उत्पन्न मिळाले. ते मागील वर्षीच्या याच सहामाहीपेक्षा 26 टक्के जास्त (3,285 कोटी रु.) होते.

त्यांना मागीलवर्षीच्या या तिमाहीत 111 कोटी रुपयांचा करोत्तर निव्वळ नफा मिळाला होता, तर यावर्षीच्या तिमाहीत तो 112 कोटी रुपये एवढा झाला. मागील वर्षीच्या एप्रिल ते सप्टेंबर या सहामाहीच्या 212 कोटी रुपयांच्या निव्वळ नफ्याच्या तुलनेत त्यांना यावर्षीच्या पहिल्या सहामाहीत 217 कोटी रुपये निव्वळ नफा मिळाला.

कोविडचा विळखा सैलावत असताना आता यावर्षीच्या दुसऱ्या सहामाहीत चांगल्या व्यवसायाची व चांगल्या नफ्याची अपेक्षा आहे, असे कंपनीचे व्यवस्थापकीय संचालक बलराम यादव यांनी सांगितले. पशुखाद्य व्यवसाय या तिमाहीत 21 टक्के वाढला, किमती वाढल्याने खाद्यतेलाचा व्यवसायही यावर्षी दुप्पट झाला, बेभरवशी पावसामुळे कृषी संरक्षण उत्पदनांचा व्यवसाय 24 टक्के घटला, डेअरीचा व्यवसायही किंचित घटला पण पोल्ट्री व कुक्कुट खाद्याचा व्यवसाय चांगलाच वाढला, असेही यादव म्हणाले.