कच्च्या तेलाच्या किमतीमध्ये गेल्या काही दिवसात सातत्याने वाढ झालेली पाहायला मिळतेय. वायदा बाजारात कच्च्या तेलाच्या किमती दोन वर्षांच्या उच्चांकावर ट्रेंड करतायत आणि येत्या काळात या किमती खाली येण्याची चिन्ह देखील नाहीत. कच्च्या तेलाबाबत ओपेक + म्हणजेच ऑर्गनायझेशन ऑफ पेट्रोलियम एक्सपोर्टींग कंट्रीज आणि त्यांच्या मित्र देशांची (Organization of the Petroleum Exporting Countries and allies) एक महत्त्वपूर्ण बैठक पार पडली. यानंतर कच्च्या तेलाच्या किमती अधिकच वधारल्याचं पाहायला मिळतंय. या अत्यंत महत्त्वाच्या बैठकीनंतर भारतीय शेअर बाजारावर याचा कसा परिणाम होऊ शकतो आणि कोणते समभाग (शेअर्स) येत्या काळात वधारू किंवा पडू शकतात त्यावर टाकूयात एक नजर. (impact of increased rates of crude oil on indian stock market and various sectors)

तेलाच्या किमती वधारल्यानं कोणत्या सेक्टरवर होईल परिणाम?

OPEC + देशांच्या बैठकीनंतर कच्च्या तेलाच्या किमतीमध्ये वाढ झाल्याचं पाहायला मिळतंय. या बैठकीमधील महत्त्वपूर्ण बाब म्हणजे येत्या काळात कच्च्या तेलाचं उत्पादन वाढवण्याचा निर्णय या बैठकीत झाला आहे. परिणामी कच्च्या तेलाच्या किमती सातत्याने वाढताना पाहायला मिळतायत. सोबतच जगभरात अनेक देशांमध्ये आता अनलॉकिंग सुरु असल्याने कच्च्या तेलाचा वापर वाढतोय, तसेच मागणीही मोठ्या प्रमाणात वाढली आहे.

कुणाला होणार फायदा?

तेल उत्पादक कंपन्यांना याचा सर्वाधिक फायदा होणार असल्याचं बोललं जातंय. यामध्ये ONGC, ऑइल इंडिया, हिंदुस्थान ऑइल एक्क्सप्लोरेशन कंपनी (HOEC) या कंपन्यांच्या समभागांमध्ये चांगली तेजी पाहायला मिळू शकते.

कोणत्या सेक्टरला बसू शकतो फटका?

वाढत्या कच्च्या तेलाच्या किमतींचा परिणाम ऑटो कंपन्यांवर होताना पाहायला मिळू शकतो. कच्च्या तेलाच्या किमतीमध्ये आणखी वाढ झाल्यास ऑटो कंपन्यांच्या मागणीत घट होऊ शकते. ज्यामुळे त्यांच्या शेअर्सच्या किमतीवर परिणाम झाल्याचं पाहायला मिळू शकतं. याचसोबत तज्ज्ञांच्या मते पेंट्स कंपन्यांना देखील याचा फटका बसू शकतो. यामध्ये एशियन पेंट्स, बर्जर पेंट्स, इंडिगो पेन्ट्स यासारख्या समभागांचा समावेश आहे. सोबतच एव्हिएशन सेक्टरला देखील याचा मोठा फटका बसू शकतो. एकीकडे जगभरात अनेक देशांमध्ये अनलॉक होत असताना एव्हिएशन सेक्टरकडून मागणी तर वाढेल, मात्र कच्च्या तेलाच्या वाढत्या किमतींमुळे विमान प्रवास अधिक महागण्याची शक्यता वर्तवली जातेय.

त्यामुळे येत्या काळात वरील कंपन्यांच्या समभागांवर नजर ठेऊन तुम्ही शेअर बाजारात गुंतवणूक करू शकतात. शेअर मार्केट किंवा म्युच्युअल फंडातील गुंतवणुकीत जोखीम असते. यामध्ये फायद्यप्रमाणे नुकसान होण्याचीही शक्यता असते. त्यामुळे शेअर बाजार किंवा म्युच्युअल फंडातील कोणतीही गुंतवणूक करण्याआधी आपल्या वित्तीय सल्लागारासोबत चर्चा करूनच गुंतवणूक करा.