मुंबई : अनुकूल जागतिक परिस्थितीमुळे आज भारतीय शेअरबाजार (Indian Share Market) निर्देशांक (coordinates) सुमारे दीड टक्का वाढले. आयटी व बँकांच्या शेअरच्या जोरावर आज सेन्सेक्स (Sensex) ९३५.७२ अंश, तर निफ्टी (Nifty) २४०.८५ अंश वाढला. निर्देशांकांची ही सलग पाचवी वाढ आहे. दिवसअखेरीस ५६,४६८.०२ अंशांवर बंद झाला, तर निफ्टीही १६,८७१.३० अंशांवर स्थिरावला.

आज आशियाई बाजार संमिश्र होते, तर युरोपीय बाजार नफा दाखवत होते, त्यातच कच्च्या तेलाच्या किमतीत किरकोळ घट झाल्याने शेअरबाजारात खरेदी झाली. सुरुवातीला व्यवहार सुरू होताना बाजार किरकोळ घसरले होते, सेन्सेक्स ५५,५५६.४७ पर्यंत घसरला. पण नंतर तेथून तो सतत वर जात राहिला. आज निफ्टीच्या प्रमुख ५० पैकी ३७ शेअरचे भाव वाढले. रिझर्व्ह बँकेने डिजिटल व्यवहारांवरील निर्बंध उठवल्याने एचडीएफसी बँक सव्वातीन टक्के म्हणजे ४५ रुपयांनी वाढून १,४४२ रुपयांपर्यंत गेला; तर रिझर्व्ह बँकेने पेटीएम बँकेवर निर्बंध लादल्याने पेटीएमचा शेअर १०० रुपयांनी घसरून ६७४ रुपयांवर गेला. हा त्याचा सार्वकालिक नीचांक आहे.

आज सेन्सेक्सच्या प्रमुख ३० पैकी फक्त हिंदुस्थान युनिलीव्हर ३४ रुपयांनी घसरून २,०६० वर आला, तर सनफार्मा (८९२), डॉ. रेड्डीज लॅब (३,९५४) व टाटा स्टील (१,२९७) हे शेअर किरकोळ घसरले. त्याखेरीज उरलेले सर्व २६ प्रमुख शेअर तेजी दाखवत बंद झाले. वाढलेल्या शेअरमध्ये इन्फोसिस (१,८९०), स्टेट बँक (४८५), मारुती (७,३१४), अॅक्सिस बँक (७१०) व आयसीआयसीआय बँक (६९६) हे शेअर अडीच ते पावणेचार टक्के वाढले. विप्रो, एचडीएफसी, टायटन, कोटक बँक, आयटीसी, टीसीएस, लार्सन ॲण्ड टुब्रो, टेक महिंद्र, महिंद्र आणि महिंद्र व एशियन पेंट हे शेअर एक ते दोन टक्के वाढले.

आजचे सोन्या-चांदीचे भाव
सोने - ५२,४७० रु.
चांदी - ७०,००० रु.