रिझर्व्ह बँक ऑफ इंडियाचे (Reserve Bank of India) गव्हर्नर शक्तीकांत दास (Shaktikanta Das) यांनी बुधवारी नवीन पतधोरण जाहीर केलंय. आरबीआयनं रेपो रेटमध्ये 0.50 टक्क्यांची वाढ केलीय, त्यामुळं रेपो रेट आता 4.40 वरून 4.90 वर पोहोचला आहे. वाढत्या महागाईला आटोक्यात आणण्यासाठी पतधोरण समितीनं रेपो दरात वाढ करण्याचा निर्णय घेतल्याचं तज्ज्ञांनी म्हटलंय.

महागाईला अटोक्यात आणण्यासाठी आरबीआयनं रेपो रेट मे महिन्यात 0.40 टक्क्यांनी वाढवण्यात आले होते. या दरवाढीनंतर 4.40 टक्के रेपो रेट झाला होता. आज 0.50 टक्क्यांनी आणखी रेपो दर वाढवण्यात आले आहेत. आता रेपो दर 4.90 % इतका असणार आहे. यामुळं सगळ्या प्रकारची कर्ज महाग होणार आहेत. एकीकडं महागाईनं कहर केला आहे. तर, दुसरीकडं आता कर्जावरील दर वाढणार असल्यानं सर्वांना मोठा धक्का आहे.

रेपो रेटमध्ये (Repo Rate) वाढ झाल्यानं कर्जे आणखी महाग झाली आहेत. घराचा आणि गाडीचा EMI वाढल्याने आधीच महागाईनं पिचलेल्या जनतेच्या खिशावर अतिरिक्त बोझा पडणार आहे. रिझर्व्ह बँकेनं महिन्याभरात दुसऱ्यांदा रेपो रेटमध्ये वाढ केलीय. गेल्या महिन्यात 4 तारखेला आरबीआयचे गव्हर्नर शक्तीकांत दास यांनी अचानक पत्रकार परिषद घेत रेपो रेट 0.40 टक्क्यांनी वाढवण्यात येत असल्याची घोषणा केली होती.