रिझर्व्ह बँकेनं पेन्शन, सॅलरी आणि ईएमआय संदर्भातील नियम बदलले आहेत. यामुळे आता बँकेच्या खाते धारकांना कामकाजाच्या दिवसापर्यंत यासाठी वाट बघावी लागणार नाही. आरबीआयने नॅशनल नॅशनल ऑटोमेटेड क्लिअरिंग हाऊसचे (NACH) नियम बदलले असून हे नियम 1 ऑगस्ट 2021 पासून लागू होणार आहेत. आरबीआयचे गव्हर्नर शक्तिकांत दास यांनी जून महिन्यातील पत धोरणाच्या आढावा बैठकीनंतर घोषणा केली होती. आता आरटीजीएस आणि एनएसीएच सुविधा 24x7 सुरु राहणार आहे.

सध्या ग्राहकांना एनएसीएच सुविधेचा लाभ घ्यायचा असेल तर बँकांच्या कामाकाजाच्या वेळेतच घ्यावा लागतो. सोमवार ते शुक्रवार या कालावधीतच ही सुविधा सुरु आहे. मात्र आता यामध्ये बदल कऱण्याचा निर्णय घेतल्यानंतर ग्राहकांना पेन्शन, वेतन मिळण्यासाठी वाट बघावी लागणार नाही. त्यांना बँकेचं कामकाज सुरु नसले तरीही पेन्शन आणि वेतन मिळेल. 1 ऑगस्ट 2021 पासून नवे नियम लागू होती. त्यानंतर शनिवार, रविवार आणि सुटीच्या दिवशीही एनएसीएचचे काम होईल.

ग्राहकांना चांगल्या सेवा पुरवण्यासाठी एनएसीएचमध्ये बदल करण्यात आला आहे. बऱ्याचदा महिन्याच्या पहिल्याच दिवशी शनिवार, रविवार किंवा सुट्टी आली तर अडचण निर्माण व्हायची. यापुढे अशी अडचण होणार नाही. एनएसीएच सेवेत करण्यात आलेल्या बदलामुळे आता एक तारखेला रविवार किंवा सुट्टी जरी असली तरी बँक खात्यात पेन्शन, वेतन जमा होईल.

नॅशनल ऑटोमेटेड क्लिअरिंग हाऊस ही एक बल्क पेमेंट सिस्टिम असून नॅशनल पेमेंट्स कॉर्पोरेशन ऑफ इंडियाकडून ही सिस्टिम चालवली जाते. वेगवेगळ्या प्रकारचे क्रेडिट ट्रान्सफर करण्यासाठी याचा वापर केला जातो. यामध्ये व्याज देणं, लाभांश देणं, पेन्शन, वेतन ग्राहकांच्या खात्यावर जमा करणे याचा समावेश असतो. एनएसीएचच्या माध्यमातून ग्राहक वेगवेगळी बिले, कर्जाचे हप्ते, म्युच्युअल फंडातील गुंतवणूक आणि विमा पॉलिसीचे प्रीमियमचा भरणा करू शकतात.