मुंबई - सार्वजनिक क्षेत्रातील सर्वात मोठी बँक असलेल्या स्टेट बॅंक ऑफ इंडियाने गेल्या दशकभरातील बॅंकेच्या निर्णयासंदर्भात कबूली दिली आहे. सरकारी मालकीमुळे आणि सार्वजनिक हिताला प्राधान्य दिल्याने खासगी क्षेत्रातील बॅंकांच्या तुलनेत शेअरची किंमत राहिली आहे, बॅंकेची त्याबद्दल कोणताही तक्रार नाही. मात्र, व्यावसायिक पातळीवरील काही निर्णय अयोग्य ठरल्याचे सांगत निर्णय प्रक्रियेत सुधारणा करण्याची आवश्यकता स्टेट बॅंकेने व्यक्त केली आहे. 

सेबीचे माजी प्रमुख एम दामोदरन यांनी आयोजित केलेल्या एका कार्यक्रमात स्टेट बॅंकेचे व्यवस्थापकीय संचालक अरिजीत बसूंनी अनेक मुद्द्यांवर आपली मते व्यक्त केली. बॅंकेने काही व्यावसायिक निर्णय घेताना चूक केली असून सामाजिक जबाबदाऱ्यांना त्याचा दोष देता येणार नाही, असेही बसू पुढे म्हणाले. स्टेट बॅंक ऑफ इंडियाचे बाजारमूल्य सध्या जवळपास 2.95 लाख कोटी रुपये आहे. तर खासगी क्षेत्रातील सर्वात मोठी बॅंक असलेल्या एचडीएफसी बॅंकेच्या बाजारमूल्याने 7 लाख कोटी रुपयांचा टप्पा ओलांडला आहे. परंतु स्टेट बॅंकेचे कर्जवितरण व्यवसाय 22.48 लाख कोटी रुपयांचा असून त्यातुलनेत एचडीएफसी बॅंकेचा कर्जवितरण व्यवसाय मात्र 9 लाख कोटी रुपयांचा आहे.

'सकाळ'चे मोबाईल ऍप डाऊनलोड करा

बसू म्हणाले, बँकेचे बाजारमूल्य जरी तुलनात्मकरित्या कमी असले तरी आमची त्याबाबतीत काही हरकत नाही. मात्र, त्याचबरोबर सरकारी मालकी असल्याचा परिणाम बँकेच्या बाजारमूल्यावर होतो''. 

मंदीच्या काळात 'इथे' मिळतील भरपूर 'रिटर्न्स'

स्टेट बॅंकेचे सामाजिक आघाडीवरील काम आणि पायाभूत सुविधा निर्माण करण्यातील योगदानाबद्दल बसू यांनी अभिमान व्यक्त केला.

मात्र व्यावसायिक निर्णयांच्या आघाडीवर गेल्या दशकात स्टेट बॅंकेने काही चुकीचे निर्णय घेतले. व्यावसायिक पातळीवर बॅंकेला सुधारणा करण्यास आणखी वाव आहे. आम्ही जर आमच्या चुका मान्य केल्या नाहीत तर ते मूर्खपणाचे ठरेल. अर्थात स्टेट बॅंक सामाजिक दृष्टिकोन ठेवून काम करते आणि बाजार तेव्हाच फायदा करून देतो जेव्हा तुम्ही व्यावसायिकदृष्ट्या योग्य पावले उचलतात. अलीकडच्या काळातील एस्सार स्टीलच्या संदर्भातील योग्य निर्णय हे त्याचेच उदाहरण आहे, असेही पुढे बसू म्हणाले.