सुकन्या समृद्धी योजनेच्या (Sukanya Samriddhi Yojana) माध्यमातून कन्येच्या नावानं दर महिन्याला थोडीफार बचत केली जाते. या योजनेत गुंतवणूक केल्यास मुलगी 21 वर्षांच्या झाल्यावर तिला लाखो रुपये मिळू शकतात. आता जर तुम्ही या योजनेत पैसे गुंतवणार असाल, तर जाणून घ्या यातील बदल. सरकारनं या योजनेत मोठा बदल केलाय.

मोदी सरकारनं (Modi Government) 2 जानेवारी 2015 रोजी 'बेटी बचाओ, बेटी पढ़ाओ' या योजनेची सुरुवात केली होती. याच पार्श्वभूमीवर मुलींच्या उज्ज्वल भविष्यासाठी व त्यांच्या आर्थिक सुरक्षेसाठी केंद्रातील मोदी सरकारनं 'सुकन्या समृद्धी योजना' सुरु केलीय.

आता तीन मुलींनाही मिळणार लाभ

या योजनेत 80 C अंतर्गत फक्त पहिल्या दोन मुलींच्या खात्यावर कर सूट देण्याची तरतूद होती. यामध्ये तिसऱ्या मुलीला हा लाभ मिळत नव्हता. नवीन नियमांनंतर आता जर एका मुलीनंतर दोन जुळ्या मुली असतील, तर त्या दोघांसाठीही खातं उघडण्याची सुविधा आहे. वडिलांना तीन मुली असतील, तर तिघांच्याही नावे पैसे जमा करता येणार आहेत.

मुदतीशिवाय व्याज मिळेल

सरकारच्या या योजनेत वर्षाला किमान 250 रुपये आणि जास्तीत-जास्त 1.5 लाख रुपये जमा करता येतात. खाते किमान रकमेवर डीफॉल्ट आहे. नवीन नियमांनुसार, खाते पुन्हा सक्रिय न केल्यास मॅच्युरिटी होईपर्यंत खात्यात जमा केलेल्या रकमेवर लागू दरानं व्याज दिलं जाणार आहे.

प्रत्येक आर्थिक वर्षात वार्षिक व्याज

नवीन नियमांनुसार, खात्यातील चुकीचं व्याज परत करण्याची तरतूद नाहीय. सुकन्या योजना खात्यावरील वार्षिक व्याज प्रत्येक आर्थिक वर्षाच्या शेवटी जमा केलं जाईल.

खातं वेळेपूर्वी बंद केलं जाऊ शकतं

मुलीच्या मृत्यूनंतर किंवा मुलीचा पत्ता बदलल्यानंतर या योजनेचं खातं बंद केलं जाऊ शकतं. मात्र, आता यामध्ये खातेदाराच्या जीवघेण्या आजाराचाही समावेश करण्यात आलाय. पालकाचा मृत्यू झाल्यास खातं मुदतीपूर्वी बंद केलं जाऊ शकतं.