Bhaubeej 2023 : दिवाळी हा आनंदाचा, प्रकाशाचा, जिव्हाळ्याचा आणि दिव्यांचा सण आहे. हिंदू धर्मामध्ये दिवाळीचे खास महत्व आहे. आपल्या देशात दिवाळी मोठ्या उत्साहात आणि थाटामाटात साजरी केली जाते.

नुकताच लक्ष्मीपूजन, नरक चतुर्दशी आणि दिवाळी पाडवा मोठ्या उत्साहात साजरा करण्यात आला. पाडवा झाला की दुसऱ्या किंवा तिसऱ्या दिवशी भाऊबीज साजरी केली जाते. आज भाऊबीजचा सण आहे.

भाऊबीजच्या सणाने दिवाळीची समाप्ती होणार आहे. भाऊ-बहीणीच्या अतूट नात्याचा दिवस आज आहे. त्यानिमित्त आपण भाऊबीजचा शुभ मुहूर्त कधी आहे ? त्याबद्दल आपण जाणून घेणार आहोत.

भाऊबीज

बहिण आणि भावाच्या नात्याला समर्पित असणारा सण म्हणजे भाऊबीज होयं. हा दिवस भाऊ आणि बहिणीसाठी खास असतो. भावाने बहिणीबद्दल आणि बहिणीने भावाबद्दल प्रेम व्यक्त करण्याचा खास दिवस म्हणजे भाऊबीज होयं.

यंदा भाऊबीजचा हा सण १५ नोव्हेंबरला बुधवारी म्हणजेच आज साजरा केला जाणार आहे. हा सण कार्तिक महिन्याच्या शुक्ल पक्षाच्या दुसऱ्या दिवशी आनंदाने साजरा केला जातो.

भाऊबीजचा शुभ मुहूर्त कधी ?

कार्तिक महिन्याच्या शुक्ल पक्षाची दुसरी तिथी ही मंगळवारी १४ नोव्हेंबरला दुपारी २ वाजून ३६ मिनिटांनी सुरू होईल. ही तिथी दुसऱ्या दिवशी १५ नोव्हेंबरला बुधवारी दुपारी १ वाजून ४७ मिनिटांनी समाप्त होईल. त्यामुळे, या परिस्थितीमध्ये उदया तिथीनुसार १५ नोव्हेंबरला भाऊबीजचा सण साजरा केला जाईल.

भाऊबीजचा शुभ मुहूर्त हा १५ नोव्हेंबरला दुपारी १ वाजून १० मिनिटे ते ३ वाजून २२ मिनिटांपर्यंत असणार आहे. या शुभ मुहूर्तावर तुम्ही भाऊबीज साजरी करू शकता.