Hindu Marriage Rituals :

प्रत्येक धर्मात वेगवेगळ्या प्रथा परंपरा असतात. रुढी परंपरांचे विशेष महत्व असते. अशीच एक प्रथा हिंदू विवाह पद्धतीत आहे, यात नवरदेवाची वरात घोडीवर काढली जाते. पण तुम्हाला हे माहित आहे का, की नवरदेवाची वरात घोडीवरच का निघते, घोड्यावर का नाही? यातही पांढऱ्या घोडीला विशेष प्राधान्य असते. पण असे का, जाणून घ्या.

असं म्हणतात रामायण-महाभारतापासून ही परंपरा पाळली जाते. तुमच्या, आमच्या पाहण्यातले अनेक जण घोडीवर बसले असतील किंवा भविष्यात बसणार असतील. हल्ली वेळेची, जागेची कमतरता, ट्रॅफीक जॅम यामुळे वराती लहान काढल्या जातात. जवळच्या मारुतीच्या मंदिरापर्यंत वरात काढण्याची पद्धत सध्या सुरु झाली आहे. पण तसेही असले तरी नवरदेवाला घोडीवर बसवलेच जाते.

घोडीवर बसण्याचं कारण काय?

वरातीत नवऱ्या मुलाला घोडीवर बसवले जाते याचा अर्थ मुलगा नव्या आयुष्याची सुरुवात करीत आहे. अशात तो वैवाहिक आयुष्याची जबाबदारी घेण्यास सक्षम असल्याचे हे चिन्ह समजले जाते.

पांढरीच घोडी का?

लग्नात नवरदेवाला पांढऱ्या घोडीवर बसवण्यास प्राधान्य असते. स्वप्नातला राजकुमार पांढऱ्या घोडीवर बसून घ्यायला येईल अशी परिकथाही रंगवल्या जातात. पण या पांढऱ्या रंगामागे शुद्धता, प्रेम, उदारता, शांतता, सौभाग्य आणि समृद्धीच प्रतीक असतं. या गुणांमुळे वैवाहिक आयुष्य आणखी समृद्ध होण्यास मदत मिळते. त्यामुळे नव्या आयुष्याची सुरुवात करताना पांढऱ्या घोडीला प्राधान्य दिलं जातं.

घोडीच का, घोडा का नाही?

घोडा रागीट असतो, असं म्हणतात. कोणत्याही प्रशिक्षणाशिवाय घोड्यावर स्वार होणे शक्य नसते. घोड्याच्या या चपळतेने पूर्वी घोडा युद्धभूमीत वापरा जात. पण लग्नाच्या वरातीत घोड्याच्या रागीट, चपळ व शक्तीवान या गुणांचा काहीही फायदा होत नाही.

उलट त्यागाला अधिक महत्व असते. घोड्याच्या तुलनेत घोडी शांतता प्रिय असते. त्यामुळे नवरदेवाला लग्नात घोड्यावर नाही तर घोडीवर बसवतात.

डिस्क्लेमर : सदर लेख फक्त सामान्य माहितीसाठी आहे. सकाळ माध्यम समूह अशा कोणत्याही गोष्टींची पुष्टी करत नाही. अधिक तपशीलांसाठी तुम्ही तज्ज्ञांचे मार्गदर्शन घेऊ शकता.