ऑनलाइन गेमिंगच्या माध्यमातून सध्या फसवणूक होत असल्याच्या अनेक घटना समोर येत आहेत. लहान मुलं गेम खेळण्यासाठी मोबाइल घेतात अन् अचानक खात्यावरुन पैसे गायब होतात. ना फोन कॉल, ना ओटीपीची मागणी किंवा सिक्रेट पिनची कोणतीही मागणी न करताही खात्यावरुन पैसे कट झाल्याच्या घटना समोर येत आहेत. अशाच प्रकारची धक्कदायक घटना छत्तीसगडमधून समोर आली आहे. एका महिलेच्या खात्यावरुन तीन लाख 20 हजार रुपये लपांस झाले आहेत. विशेष म्हणजे यासाठी कुठलाही ओटीपी किंवा पिन नंबरचीही मागणी केली गेली नव्हती.

पोलिसांनी या घटनेचा आधिक तपास केला असात गेमिंगच्या माध्यमातून पैसे लंपास झाल्याची धक्कादायक माहिती समोर आली आहे. छत्तीसगडच्या कांकेर येथा हा प्रकार घडला आहे. एक महिला एटीएममध्ये पैसे काढण्यासाठी गेली होती, तेव्हा तिला आपल्या खात्यावर फक्त 9 रुपये शिल्लक असल्याचं दिसलं. खात्यातून तब्बल तीन लाख 20 हजार गायब झाल्याची धक्कादायक घटना समोर आली आहे. यानंतर महिलेनं पोलिसांत धाव घेत तक्रार केली.

ऑनलाईन गेमच्या माध्यमातून महिलेच्या खात्यावरुन तीन लाख 20 हजार रुपये लंपास झाल्याचं पोलिसांना तपासून समोर आलं आहे. धक्कादायक बाब म्हणजे, ही रक्कम काढण्यासाठी तब्बल 287 वेळा व्यवहार करण्यात आले होते. महिलेच्या 12 वर्षाचा मुलगा फ्री फायर हा गेम खेळत असताना खात्यावरुन पैसे लंपास झाल्याचा प्रकार घडला आहे. 12 वर्षाच्या मुलाला फ्री फायर या ऑनलाइन गेमचं व्यसन लागलं आहे. मोबाइलवर तो सतत गेम खेळत होता. गेमसाठीच्या आर्थिक व्यवहारांसाठी 12 वर्षाच्या मुलाने आईचे बँक खातं लिंक केले होते. तो गेममध्ये हत्यारे खरेदीसाठी या बँक अकाऊंटचा वापर करायचा. यातूनच त्याने तब्बल 287 वेळा व्यवहार करत 3 लाख 22 हजार रुपये खर्च केल्याचं समोर आलं आहे. पण धक्कादायक बाब म्हणजे, या व्यावहारासाठी कोणताही कॉल आलेला नव्हता. तसेच ओटीपी, एटीएम पिन नंबरही त्यांच्याकडून कधी मागितला गेला नव्हता. हा सर्व प्रकार समोर आल्यानंतर त्यांना धक्काच बसला आहे.