Russia-Ukraine War : युक्रेनमध्ये अडकलेल्या भारतीय नागरिकांसाठी केंद्र सरकार ऑपरेशन गंगा (Operation Ganga) राबवत असून, या अंतर्गत आतापर्यंत किती भारतीय मायदेशात परतले आहेत याबद्दल परराष्ट्र मंत्रालयाकडून महत्त्वाची आकडेवारी देण्यात आली आहे. ऑपरेशन गंगा अंतर्गत आतापर्यंत जवळपास 13 हजार 300 नागरिकांना भारतात सुखरूप आणण्यात आले आहे. पुढील 24 तासांसाठी 13 विमाने नियोजित असल्याचे परराष्ट्र मंत्रालयाकडून सांगण्यात आले आहे.

मागील 24 तासांमध्ये आणखी 15 विमानांद्वारे 2 हजार 900 जण आले असल्याचेही परराष्ट्र मंत्रालयाचे (Ministry of Foreign Affairs) प्रवक्ते अरिंदम बागची यांनी सांगितले. मिशन गंगा अंतर्गत आतापर्यंत 63 विमाने भारतात पोहचली असल्याचे त्यांनी यावेळी सांगितले. (Ukraine Russia Latest News In Marathi)

सुमीत अडकलेल्या भारतीय विद्यार्थ्यांना सरकारचा सल्ला

युक्रेनच्या युद्धग्रस्त सुमी शहरात अडकलेल्या भारतीय विद्यार्थ्यांचे व्हिडिओ समोर आल्यानंतर भारत सरकराने या विद्यार्थ्यांना घरांमध्ये सुरक्षित राहण्याचा सल्ला दिला आहे. सुमीमध्ये अडकलेल्या भारतीय विद्यार्थ्यांनी व्हिडिओमध्ये रशियाच्या सीमेकडे जात असल्याचे नमुद केले होते. त्यानंतर सरकारने विद्यार्थ्यांना घरांमध्ये सुरक्षित राहण्याचा सल्ला दिला आहे. तसेच दूतावासाचे अधिकारी या विद्यार्थ्यांच्या सतत संपर्कात असल्याचेही परराष्ट्र मंत्रालयाने म्हटले आहे. (Indian Student In Ukraine)

सरकारने विद्यार्थ्यांना सुरक्षिततेची खबरदारी घेण्याचे आणि आश्रयस्थानांमध्ये राहण्याचे आवाहन केले आहे. सुरक्षित कॉरिडॉर तयार करण्यासाठी सरकारने रशियन आणि युक्रेनियन सरकारांवर तात्काळ युद्धबंदीसाठी अनेक माध्यमांद्वारे जोरदार दबाव आणला आहे, असे परराष्ट्र मंत्रालयाने शनिवारी जारी केलेल्या निवेदनात स्पष्ट केले आहे