उत्तर प्रदेशातील प्रयागराज जिल्ह्यात एकाच कुटुंबातील पाच जणांची हत्या झाल्याची खळबळजनक घटना समोर आली आहे. घटनास्थळी दाखल झालेल्या पोलिसांनी मृतदेह ताब्यात घेऊन तपास सुरू केला आहे. ही घटना प्रयागराजमधील तरवाईच्या खैवाजपूर गावातील आहे. जिथे एकाच कुटुंबातील पाच जणांची निर्घृण हत्या करण्यात आली. या घटनेमध्ये दाम्पत्यासह त्यांची मुलगी, सून आणि 2 वर्षांची नात यांचा समावेश आहे. सर्वांवर धारदार शस्त्रांनी वार करून जीवे मारण्यात आले.

हा गुन्हा केल्यानंतर मारेकऱ्यांनी घरातील एका खोलीला आग लावली. घरातून धूर निघत असल्याचे पाहून ही घटना उघडकीस आली. मृतांमध्ये राम कुमार यादव (55), त्यांची पत्नी कुसुम देवी (52), मुलगी मनीषा (25), सून सविता (27) आणि नात मीनाक्षी (2) यांचा समावेश आहे. तर दुसरी नात साक्षी (५) जिवंत सापडली आहे. हत्या कोणी व का केल्या याबाबत काहीही माहिती मिळालेली नाही.

सध्या प्रयागराजचे डीएम आणि एसएसपी आणि इतर पोलीस अधिकारी तपासात गुंतले आहेत, त्यांच्या म्हणण्यानुसार डोक्यावर काठीने वार करून हत्या करण्यात आली आहे. मुलीवर बलात्कार झाल्याच्या शक्यतेवर पोलिसांनी पोस्टमार्टमनंतरच संपूर्ण घटनेचा उलगडा होणार असल्याचे सांगितले. याआधी १६ एप्रिलला अशाच एका घटनेत प्रीती तिवारी (३८) आणि तिच्या तीन मुली माही (१२), पिहू (८) आणि कुहू (३) यांची प्रयागराजमधील नवाबगंजमधील खगलपूर गावात गळा चिरून हत्या करण्यात आली होती, तर पती राहुल तिवारी (४२) लटकलेले आढळले होते.

दरम्यान घरामध्ये सर्वांचे मृतदेह पडलेले आढळून आले. घटनास्थळी एक सुसाईड नोटही सापडली असून, त्यामध्ये या घटनेसाठी सासरच्या मंडळींना जबाबदार धरण्यात आले आहे. पोलिसांनी चौघांवर खुनाचा गुन्हा दाखल केला. राहुल हा मूळ कौशांबीच्या भादवा गावचा असून. सुमारे अडीच महिन्यांपासून तो खगलपूर येथे भाड्याच्या घरात पत्नी व मुलींसह राहत होता. 16 एप्रिल रोजी सकाळी बराच वेळ कुटुंब न दिसल्याने शेजाऱ्यांनी फोन केला असता त्यांना राहुल अंगणात फासावर लटकलेला दिसला.

आवाजाने ग्रामस्थ जमा झाले आणि त्यांनी आत जाऊन पाहिले असता खोलीत प्रीती व तीन मुलींचे रक्ताळलेले मृतदेह पडलेले होते. तपासादरम्यान प्रीती आणि तिन्ही निष्पापांचा गळा चिरून खून केल्याचे निष्पन्न झाले. तपासादरम्यान पोलिसांना घरातूनच दोन पानांची सुसाईड नोट सापडली. यामध्ये सासरच्या पक्षातील एकूण 11 जणांची नावे लिहिली असून, त्यांच्यावर छळ केल्याचा आरोप आहे. या लोकांच्या त्रासाला कंटाळूनच मी हे पाऊल उचलत असल्याचंही लिहिलं आहे.