जम्मू-काश्मीरच्या किश्तवाडमध्ये भीषण अपघात झाला आहे. धरणावर काम करणाऱ्या मजुरांना घेऊन जाणारे वाहन उलटल्यामुळे अपघात झाला आहे. या अपघातात सहा मजुरांचा मृत्यू झाला असुन तीन मजूर जखमी झाले आहेत. जखमींना उपचारांसाठी रुग्णालयात दाखल करण्यात आलं आहे.

किश्तवाड पोलिसांनी दिलेल्या माहितीनुसार, ही घटना डांगदुरु पॉवर प्रोजेक्टजवळ घडली आहे. या प्रकल्पावर काम करणाऱ्या मजुरांना घेऊन जाणारे क्रूझर वाहन पलटल्यामुळे अपघात झाला आहे. हा अपघात सकाळी 8.35 च्या सुमारास झाला. या अपघातात सहा जणांचा मृत्यू झाल्याची प्राथमिक माहीती समोर आली आहे. अपघाताच्या ठिकाणी बचावकार्य सुरु आहे.

अपघात झाला तो परिसर अतिशय दुर्गम आणि जिल्हा मुख्यालयापासून दूर अंतरावर आहे. मदत कर्मचाऱ्यांचे पथक घटनास्थळी पोहोचलं आहे. सर्व जखमींना रुग्णालयात दाखल करण्यात येत आहे. मृतांची ओळख अद्याप पटलेली नाही. मात्र हे सर्व मजूर स्थानिक असण्याची शक्यता वर्तवण्यात आली आहे.

तर केंद्रीय मंत्री जितेंद्र सिंह यांनीही ट्वीट करत या घटनेची माहिती दिली आहे. अपघातग्रस्तांना आवश्यक ती सर्व मदत पुरवली जात असल्याचे त्यांनी सांगितले आहे. डंगदुरु प्रकल्पाच्या ठिकाणी झालेल्या दुर्दैवी अपघाताबाबत किश्तवाडचे डीसी डॉ. देवांश यादव यांच्याशी चर्चा करुन माहिती घेतल्याचंही त्यांनी सांगितलं आहे.