एका कारमध्ये लोखंडी पेटीत रोख रक्कम सापडली असून, या रकमेबाबत, रक्कम घेऊन जाणाऱ्याबाबत, वाहनाबाबत व सोबत असलेल्या सुरक्षा रक्षकाबाबत समाधानकारक उत्तर न मिळाल्याने कार व ८८ लाख रुपयांची रक्कम पोलिसांनी चौकशीसाठी जप्त केली.

कर्नाटक विधानसभा निवडणुकीच्या पार्श्वभूमीवर सीमा भागात असलेल्या चेक पोस्टपैकी अक्कलकोट तालुक्यातील तोळणूर चेकपोस्टवर ही घटना घडली. अक्कलकोट दक्षिण पोलिस अधिक तपास करीत आहेत.

सध्या कर्नाटक राज्यात विधानसभा निवडणूक सुरू आहे. त्या पार्श्वभूमीवर अक्कलकोट दक्षिण पोलिस ठाण्याच्या हद्दीमधील महाराष्ट्र- कर्नाटक सीमेवर जाणाऱ्या सर्व रस्त्यांवर चेकपोस्ट लावण्यात आलेले आहेत.

तालुक्यातील तोळणूर गावातील चेकपोस्टवर पोलिस अंमलदार पोलिस हेडकॉन्स्टेबल पांढरे यांनी वाहनांची तपासणी करीत असताना कारला (एमएच १३- सीयू ७५४५) थांबवून त्याची तपासणी केली असता त्या वाहनातील डिकीमध्ये एका लोखंडी पेटीत रोख रक्कम असल्याचे आढळले. त्यांच्याकडे या रोख रकमेबाबत व वाहन आणि सुरक्षा गार्डबाबत चौकशी केली असता त्यांनी समाधानकारक उत्तर दिले नाही.

तसेच सदरची कार ही अधिकृत रोख रक्कम वाहतुकीसाठी असल्याबाबत कोणतीही कागदपत्रे न दाखविल्याने उपविभागीय पोलिस अधिकारी राजेंद्रसिंह गौर, पोलिस निरीक्षक महेश स्वामी यांनी तत्काळ घटनास्थळी जाऊन चौकशी केली.

रोख रक्कम ८८ लाख, वाहन व सोबत असलेल्या सुरक्षा रक्षकाबाबत समाधानकारक उत्तर न मिळाल्यामुळे ही रक्कम कारसह अक्कलकोट दक्षिण पोलिस ठाण्यात आणून दोन पंचांसमक्ष जप्त करून पेटी सीलबंद करण्यात आल्याची माहिती पोलिसांनी दिली. या रोख रकमेबाबत योग्य ती चौकशी होण्याकरिता आयकर विभाग, सोलापूर यांना पोलिसांनी कळविले आहे.

ही कामगिरी पोलिस अधीक्षक शिरीष सरदेशपांडे, अपर पोलिस अधीक्षक हिंमत जाधव, उपविभागीय पोलिस अधिकारी राजेंद्रसिंह गौर यांच्या मार्गदर्शनाखाली पोलिस निरीक्षक महेश स्वामी, हेडकॉन्स्टेबल पांढरे, अजय भोसले तसेच पोलिस मुख्यालय यांच्याकडील पोलिस कॉन्स्टेबल घोडके यांनी केली आहे.