गुजरातच्या नवसारी (Gujarat Navsari) इथं आज (शनिवार) सकाळी भीषण रस्ता अपघात झाला आहे. या अपघातात कार आणि बसची (Car-Bus Accident) जोरदार धडक झाली. यामध्ये 9 जणांचा दुर्दैवी मृत्यू झालाय.

या दुर्घटनेत अनेक जण जखमी झाल्याचं वृत्त आहे. राष्ट्रीय महामार्ग क्रमांक 48 वर वेसमा गावाजवळ हा प्रकार घडला. बस चालकाला (Bus Driver) चालत्या वाहनात हृदयविकाराचा झटका आल्याचं सांगण्यात येत आहे. यामुळं त्याचं वाहनावरील नियंत्रण सुटलं आणि कारला धडक दिली.

माहिती मिळताच पोलिसांनी घटनास्थळ गाठून दोन्ही वाहनांमध्ये अडकलेल्या लोकांना बाहेर काढलं. यापैकी जखमींना उपचारासाठी जवळच्या रुग्णालयात दाखल करण्यात आलंय, तर मृतदेह बाहेर काढून शवविच्छेदनासाठी पाठवण्यात येत आहेत. मृतदेह बाहेर काढण्यासाठी दोन्ही वाहनांच्या काचा फोडाव्या लागल्याचं पोलिसांनी सांगितलं, त्यामुळं जखमींपर्यंत मदत पोहोचण्यास थोडा विलंब झाला आहे.

अपघातानंतर महामार्गावर जाम

सकाळी झालेल्या या अपघातानंतर महामार्गावर बराच वेळ जाम झाला होता. सर्व जखमींना तातडीनं रुग्णालयात नेऊन आणि मृतदेह शवविच्छेदन गृहात पाठवल्यानंतर पोलिसांनी दोन्ही वाहनं क्रेनच्या साहाय्यानं रस्त्याच्या कडेला लावली. मात्र, यासाठी पोलिसांना अनेक अडचणींचा सामना करावा लागला.