Karnataka Assembly Election 2023 : कर्नाटक विधानसभा निवडणुकीसाठी उमेदवारांची यादी जाहीर झालीये. आज 20 एप्रिल ही उमेदवारी अर्ज भरण्याची शेवटची तारीख आहे.

मात्र, या निवडणुकीत काँग्रेसच्या (Congress) उमेदवाराची जोरदार चर्चा सुरु आहे. कारण, काँग्रेसनं दिलेल्या उमेदवाराचं वय तब्बल 91 वर्ष आहे. ते कर्नाटकचे सर्वात जुने उमेदवार आहेत.

सध्या ते काँग्रेसचे विद्यमान आमदार असून यावेळीही ते निवडणुकीच्या रिंगणात उतरले आहेत. कर्नाटकातील सर्वात वयोवृद्ध उमेदवाराचं नाव आहे शामनुर शिवशंकरप्पा (Shamanur Shivashankarappa). वयाच्या 91 व्या वर्षी निवडणुकीच्या मैदानात उतरलेल्या या आमदाराला अजूनही आपल्या विजयाची खात्री आहे.

शिवशंकरप्पा हे पाच वेळा आमदार आणि माजी लोकसभेचे सदस्य आहेत. त्यांनी दावणगिरी दक्षिणमधून निवडणूक लढवली आहे. या वयात काँग्रेसनं त्यांना तिकीट कसं दिलं? या प्रश्नाला उत्तर देताना ते म्हणाले, 'शर्यतीसाठी नेहमीच तगड्या घोड्याची निवड केली जाते. मीही असाच घोडा आहे, त्यामुळं ही निवडणूक मी सर्वात मोठ्या फरकानं जिंकणार आहे.'

कर्नाटकात 10 मे रोजी विधानसभा निवडणूक होत आहेत. या निवडणुकीत शिवशंकरप्पांची मुख्य लढत दावणगिरीचे माजी नगराध्यक्ष अजय कुमार यांच्याशी आहे. शिवशंकरप्पांनी उमेदवारी अर्ज भरताना 312.75 कोटी रुपयांची संपत्ती जाहीर केली आहे.

शेट्टर यांना काँग्रेसमध्ये आणण्यात महत्त्वाची भूमिका

माजी मुख्यमंत्री आणि भाजप नेते जगदीश शेट्टर यांना काँग्रेसमध्ये सामील करून घेण्याची जबाबदारी पक्षानं त्यांच्यावर सोपवली होती. यावरूनच आपल्या लक्षात येईल की, शिवशंकरप्पा काँग्रेससाठी किती महत्वाचे नेते आहेत. भाजपनं शेट्टर यांना आगामी निवडणूक लढवण्यासाठी तिकीट न दिल्यामुळं त्यांनी पक्ष सोडला आणि ते काँग्रेसमध्ये दाखल झाले. काँग्रेसनं शिवशंकरप्पा यांचे पुत्र आणि माजी मंत्री एसएस मल्लिकार्जुन यांना दावणगिरी उत्तरमधून उमेदवारी दिली आहे.