सध्याचं युग हे सोशल मीडियाचं युग आहे. रोज काहीना काही ट्रेंडींगमध्ये असते. मनोरंजन, फॅशन, कला, शिक्षण, पर्यटन अशा विविध प्रकारच्या उपयुक्त गोष्टी आपल्याला सोशल मीडियावर सहजतेने पाहता येतात. परंतु त्याचवेळी दुसऱ्या बाजूला उथळ गोष्टींचीही कमी नाही. एकीकडे सोशल मीडियावर अश्लीलता आणि दहशत निर्माण करणाऱ्या व्हिडीओ मोठ्या प्रमाणात व्हायरल होत असतानाच एका चिमुलकीचा हृदयाला भिडणारा व्हिडीओ सोशल मीडियावर (Social Media) व्हायरल (Viral) होत आहे. (A video of a Girl child helping a frightened dog with the sound of firecrackers has gone viral on social media)

व्हायरल व्हिडीओमध्ये आपल्याला एका रस्त्याच्या कडेला बसलेला काळ्या रंगाचा कुत्रा (Dog) दिसतो. गुलाबी रंगाचं जॅकेट परिधान केलेली एक गोंडस चिमुकली (Girl Child) तिथे येते. ती त्या कुत्र्याला मायेने गोंजारत असते. कुत्राही शांतपणे बसलेला असतो. दरम्यान अचानक तिथे फटाक्यांचा (Fireworks) आवाज सुरु होतो आणि कुत्रा बिचकतो. दरम्यान कुत्रा फटाक्यांच्या आवाजाने घाबरलाय हे लक्षात येताच चिमुकली क्षणाचाही विलंब न करता कुत्र्याच्या जवळ जाऊन त्याच्या दोन्ही कानांवर हात ठेवते, जेणेकरून त्याला फटाक्यांचा आवाज ऐकू जाऊ नये आणि तो घाबरू नये.

व्हायरल व्हिडीओमधील चिमुकल्याच्या या साध्या कृतीने तिने लोकांची मने जिंकली आहेत. इवल्याशा वयातील तिची संवेदनशीलता आणि हजरजबाबीपणामुळे नेटकरी प्रभावित झाले आहेत. ‘Yog’ या ट्विटर (Twitter) हॅण्डलवरील हा व्हिडीओ सोशल मीडियावर व्हायरल होत आहे.