नवी दिल्ली : दिल्लीच्या जहांगिरपुरी इथं हिंसाचारातील आरोपींची घर बुलडोझरनं पाडल्यानंतर आता अशीच कारवाई उत्तर प्रदेशातील प्रयागराज इथं करण्यात आली आहे. प्रयागराज इथल्या अटाला इथं शुक्रवारी नमाज पठणानंतर मोठ्या प्रमाणावर गर्दी जमली होती त्यानंतर हिंसाचाराच्या घटनाही घडल्या होत्या. या हिंसाचारातील आरोपी मोहम्मद जावेद ऊर्फ जावेद पंप हाच मास्टरमाईंड असल्याचं सांगण्यात येत आहे. त्यामुळं त्याच्या घरावर बुलडोझर चालवण्यात येत आहे. यावेळी मोठ्या प्रमाणावर पोलीस बंदोबस्त तैनात करण्यात आला आहे. (After Delhi Now bulldozer driven on Prayagraj violence accused house)

प्रयागराज विकास प्राधिकारणानं (पीडीए) नोटीस जाहीर करत १२ जून रोजी सकाळी ११ वाजता घर खाली करण्याची नोटीस जावेद पंपच्या घरावर चिटकवली होती. पण सकाळी वेळेआधीच प्रशासनानं कारवाईला सुरुवात केली. यावेळी पंपचे कुटुंबीय घरातच होते. जावेदचं घर बेकायदा बांधल्याचं या नोटीस म्हटलं आहे.

दरम्यान, अटाला हिंसाचारप्रकरणी पोलिसांनी पाच डझनावरुन अधिक आरोपींची यादी तयार केली असून यांच्या अटकेसह इतर कारवायांचे आदेश देण्यात आले आहेत. त्यामुळं जिल्हा प्रशासन, प्रयागराज विकास प्राधिकरणाची टीम शनिवारी दिवसभर अटाला आणि इतर भागात आरोपींच्या घरांची नोंदणी करत होते.

अटाला हिंसाचाराच्या मास्टरमाईंडला अटक, ६८ जण ताब्यात

अटाला इथं शुक्रवारी नमाजनंतर हिंसाचार उसळला होता. या हिंसाचाराचा मास्टरमाईंड जावेद पंपला पोलिसांनी शनिवारी अटक केली. त्याला करेली येथील घरातून पकडण्यात आलं. त्याचबरोबर याप्रकरणी रात्रभर सुरु असलेल्या कोंबिग ऑपरेशनदरम्यान ३२ इतर आरोपींनाही ताब्यात घेण्यात आलं आहे. शनिवारी उशीरापर्यंत ६८ जणांना ताब्यात घेण्यात आलं. व्हिडिओ आणि सीसीटीव्ही फुटेजच्या माध्यमातून आरोपींचा शोध घेतला जात आहे.