हैदराबादमधील नामपल्ली महानगर न्यायालयातील खासदार/आमदारांसाठीच्या विशेष सत्र न्यायालयाने बुधवारी तेलंगणा विधानसभेतील एआयएमआयएम(MIM) चे नेते अकबरुद्दीन ओवेसी यांची निर्मल आणि निजामाबाद जिल्ह्यांशी संबंधित दोन द्वेषपूर्ण भाषण प्रकरणात निर्दोष मुक्तता केली. त्यासाठी योग्य पुरावे सादर करण्यात फिर्यादी अयशस्वी ठरल्याचे न्यायालयाने म्हटले आहे. अकबरुद्दीन यांनी भविष्यात राष्ट्रीय अखंडता लक्षात घेऊन कोणतेही वादग्रस्त भाषण करू नये, असे निर्देशही दिले आहेत.

डिसेंबर 2012 मध्ये तेलंगणातील निजामाबाद आणि निर्मल येथे कथित द्वेषयुक्त भाषणे केल्याबद्दल अकबरुद्दीन यांच्यावर खटले चालू होते. या दरम्यान मंगळवारी विशेष न्यायालयाने या दोन्ही प्रकरणातील निकाल बुधवारपर्यंत राखून ठेवला होता. बचाव पक्ष आणि फिर्यादीचा युक्तिवाद पूर्ण झाल्यानंतर मंगळवारी हे प्रकरण निकालासाठी ठेवण्यात आले होते आणि निकाल बुधवारपर्यंत पुढे ढकलला होता.

ऑल इंडिया मजलिस-ए-इत्तेहादुल-मुस्लिमीन (AIMIM) प्रमुख आणि हैदराबादचे खासदार असदुद्दीन ओवेसी यांचे धाकटे भाऊ अकबरुद्दीन यांच्यावर भारतीय दंड संहितेच्या काही कलमांतर्गत द्वेषपूर्ण भाषणे केल्याबद्दल गुन्हा दाखल करण्यात आला होता, ज्यामध्ये त्यांनी सार्वजनिक भाषणादरम्यान एक समुदायाविरोधात प्रक्षोभक आणि अपमानास्पद भाषा वापरली.

यापूर्वी, अकबरुद्दीन ओवेसी यांच्यावर 8 डिसेंबर 2012 रोजी निजामाबादमध्ये आणि 22 डिसेंबर 2012 रोजी निर्मल शहरात कथित द्वेषयुक्त भाषण केल्याप्रकरणी अनेक गुन्हे दाखल करण्यात आले होते.

त्यांना अटकही झाली आणि नंतर जामिनावर सुटका झाली. गुन्हे अन्वेषण विभागाने (सीआयडी) निजामाबाद प्रकरणाचा तपास करून 2016 मध्ये आरोपपत्र दाखल केले, तर निर्मल प्रकरणाचा तपास करणाऱ्या जिल्हा पोलिसांनीही त्याच वर्षी आरोपपत्र सादर केले. निजामाबाद प्रकरणात एकूण 41 साक्षीदार तपासण्यात आले, तर निर्मल प्रकरणात 33 साक्षीदार तपासण्यात आले.